Kommunit innarluutillit sullittalissavaat

Isumaqatigiissut isumaginninnermut naalakkersuisumit Maliina Abelsenimit KANUKOKA-llu siulittaasuanit Enok Sandgreenimit atsiorneqarpoq.

- Naammagisimaarparput. Allamut aallariarfissaqanngittutut isigigatta. Isumaqatigiissimavugut atsiornissaq tullinnguuttoq, taamaattumik oqarsinnaavunga naammagisimaarlugu, KANUKOKA-p siulittaasua Enok Sandgreen oqarpoq.

Isumaqatigiissutip kinguneranik innarluutilinnut sullissinermi aningaasartuutit kommunit nammattussanngorpaat. Tamatumunnga atatillugu Namminersorlutik Oqartussat kommuninut ukiumut 372 millionit koruuninik aningaasaliissuteqartassapput.

Enok Sandgreen neriorsuivoq, innarluutillit sullinneqarnerat pitsaanerulissasoq.

- Sullinneqarneq eqaannerulissaaq, kommunit ukiortaamiit sullissisuulissapput. Ukiortaamiit sullinneqartussaq sukkanerusumik sullinneqartalissaaq, allaffinnut allanut nuutseqattaarnagu sullinneqartoq sullinneqartalissaaq, Enok Sandgreen oqarpoq nangillunilu:

- Kaassuartakkanik pisaartoqarniaruni, kommuniusup kaassuartakkanik pisaarniartoq qinnuteqaassuttarpaa. Saaffiginnissutit sivisuumik akiniarnerat sivisusarpoq apeqqutaalluni suna saaffiginnissutigineqarsimanersoq. Tamakku atorunnaassapput, kommuni nammineerluni ikiorneqartussat ukiortaamiit ikiortalissavaat, Enok Sandgreen oqarpoq.

Namminersorlutik Oqartussat akisussaaffiit tamarmik kommuninut tunniunnavianngilaat, Danmarkiliaassisarneq Namminersorlutik Oqartussanit suli akisussaaffigineqartussaammat.

Innarluutillit maannakkut sullinneqarnerminniit pitsaanerusumik sullinneqalernissaat Enok Sandgreenip sulissutiginiarpaa:

- Allaffissornikkut ingerlatsineq unamminarnerpaajuvoq. Allaffissornikkut qanoq pitsaanerutigisumik ingerlanneqarsinnaanersoq maannakkut misissorneqarpoq, taanna unamminartoqartipparput, Enok Sandgreen oqarpoq.