Kommunit ikiorsiigasuartussanik namminneq pilersitsinialerput
Kommunit tallimaannaat ullumikkut ikiuigasuartussanik sillimasoqarput, taamaattumik sakkortuumik pisoqartillugu kommunit sinnerisa avataanniit piaartumik ikiorserneqartarnissartik pisariaqartippaat.
Tamannarpiaq tunngaviuvoq isumaginnittoqarfinni pisortat Maniitsumi ataatsimeersuarneranni KANUKOKAp aqutaanik ikiuigasuartussanik sillimasoqalernissaanik kissaateqarnermut.
KANUKOKAmi inunnik isumaginninnermut siunnersortaaneq Kesia Brun oqarpoq
ikiuigasuartartunik pilersitsinissamut peqqutaaqataasoq ilinniarsimasunik sulisussaaleqineq pissutigalugu aaqqissuussamik ikiuigasuartussanik pilersitsinissamut nukissaaleqineq.
Oqaatigaa KANUKOKAmiit suliassartik siulleq tassaasoq kommunit pilersitsereersimasut attaviginissaat, paasiniarlugu allanik ikiuinissaminnut qanoq piareersimatiginersut.
Taamatut ikiuigasuarnissaq pisariaqartarpoq alianartumik nalaataqarsimasut piffissami siullerpaami misigissutsitigut annissiveqarnissartik pisariaqartittarmassuk. Taamaanngippat ukiut amerlasuut qaangiuppata annertuumik suliassanngorluni qaffassinnaammat.
Kesia Brunip ilanngullugu erseqqissarpaa inunnik misigissutsikkut sakkortuumik eqqugaasunik ikiuinermi inunnguuseralugu oqaatsit atorlugit ikiuinissaq pingaartorujussuusoq. Taamaattumillu ukiorpassuarni ilinniarsimanngikkaluarlutik sullissisimasut misilittagaqqortuut pikkorissaanertigut amigaataannik immersorneqartuarnissaat pisariaqartoq.
