Kommunit: Atuartitsinerulerneq sipaarutaassanngilaq

Ilinniartitsisut sulinerulersinngikkaluarlugit aaqqiagiinngissutit aaqqiivigineqarsinnaasut, KANUKOKA´p siulittaasua Martha Abelsen oqarpoq.

Atuarfinni suliassat allat, soorlu isumaginninnikkut suliassat, anitsiarnermi paarsinerit allallu, ilinniartitsisuunngitsunit suliarineqarsinnaanissaat kommunit naalakkersuisullu takorloorpaat:

- Isumaqatigiinniutissatut taakkua tunniunneqarnikuupput, tassanilu eqqarsaatigineqarpoq ilinniartitsisuniit allatut ilinniagaqarsimasunik suliarineqarsinnaasut. Meeqqanut ilinniartitsinerit tiimit amerlanerpaat tussinnaanissaat eqqarsaatigalugu allannguinissaq anguniarparput, KANUKOKA´p siulittaasua Martha Abelsen oqarpoq.

Tassalu ilinniartitsisut piffissaq atuartitsivinnermut atortagaat annertusarneqassaaq, tamannalu sipaarniuteqanngikkaluarluni anguneqarsinnaasoq, Martha Abelsenip oqaatigaa:

- Isumaqatigiinniutigineqartussaapput allanngortiterinerup iluaninngaanniit tiguneqassallutik. Aallaqqaataaniillu oqarnikuuvugut sipaarniaannavilluta sipaarnianngilagut. Isumaqatigiinniarnermi uani anguniarneqarpoq tiimit atuartitsiviusut meeqqanut toqqaannartumik tuttartut amerlanerpaat ilinniartitsisut meeqqallu akornanni atorneqalissasut, Martha Abelsen oqarpoq.

Ilinniartitsisut akunnermi ataatsimi atuartitsissagaangamik akunnermik ataatsimik piareersarnermut atorsinnaatitaavaat, ilinniartitsisullu piffissaq sulinermut atortagaat amerlinngikkaluarlugit piffissaq atuartitsivinnermut atorneqartartoq annertusineqassappat malittarisassat allanngortinneqartariaqassapput.
Tamannalu tassa kommuninit Naalakkersuisuniillu piumasaqaataasoq Martha Abelsen oqarpoq:

- Uani aamma isumaqatigiinniutissatut oqaluuserisassaq taanna qaqinneqarnikuuvoq. Massakkuminngaanniit allaanerusumik iliuuseqarluni isumaqatigiinniarnerni qaqinneqarput, oqarsinnaanngilangalu qanoq inerneqarumaarnersoq taanna, kisianni ullumikkuminngaanniit allaanerusumik angusaqartariaqarluta tassani aamma piumasaqarpugut, KANUKOKA´p siulittaasua Martha Abelsen oqarpoq.

Sulisitsisut IMAK´illu akornanni aaqqiagiinnginneq anigorniarlugu nunatta eqqqartuussisuunerata Søren Søndergård Hansenip isumaqatigiissitsiniartussaanera Naalakkersuisut kommunillu siunnersuutigaat.

Ilinniartitsisut kattuffiata, IMAK´ip Namminersorlutik Oqartussanut isumaqatigiissutaat kingulleq apriilip aallaqqaataani 2010-mi atuukkunnaarpoq.
IMAK´ip siulittaasua Sivso Dorph oqaaseqartinniaraluaratsigu iluatsinngilarput.