Kommunit angerlarsimaffiup avataanut inissitanik sumiginnaapput
Meeraq angerlarsimaffiup avataanut inissinneqaraangami pinngitsoornani ullut 14-it qaangiuttinnagit meeqqamut angajoqqaanut, angajoqqaarsianullu allassimasumik takutitsisoqartussaasoq inatsiseqarpoq. Tassa tamanut toqqissisimasumik nalorninaatsumillu inuuneqarnissaq anguniarlugu.
Taamaattoq inatsit taanna malinneqarnerunani unioqqutinneqakkajunnerusoq paasinarsivoq. Arnarsiaasartoq Marie Hansen ima oqarpoq:
”Meeqqat taakku 70-it akornganni paarsattinni ataasiinnaq handleplaneqartillugu, malitassaqartilluta paarinikuuvarput nalunagu qanoq ingerlasussaalluta.”
Taamaasillutik Marie Hansenikkut nammineerlutik pisortat avaqqullugit toqqaannartumik angajoqqaajusullu isumaqatigiinniartarsimapput qanoq pisoqarnissaa pillugu.
Meeqqallu ilaat ukiuni qulini paarisarinikuuvaat oqaasinnguamilluunniit iliusissamik allassimasoqanngitsoq.
Ilaqutariinnermut Peqqinnissamullu naalakkersuisoq Arkalo Abelsen oqarpoq kommunet pappiaqqamik immersoriaannarmik peqalernikuusut pikkorissaagaangamillu ilitsersuussutigisarnerarpaat pappiaqqat ullut 14-it qaangiutsinnagit suliarineqartussaasut. Imalu nangippoq:
”Uanga isumaqarpunga tassa paasisitsiniaajuarneq taavalu pikkorissaanerni tassannga pikkorissaajuartitsijuarneq aqqutissaasut aamma isumaqarpunga maannakkut kommunerujussuit assigiinngitsunik pikkoriffeqarmata kattussuunnerminnut atatillugu oqaloqatigiiffissaasa ilagisariaqaraat taanna kommuneni taakkunani sisamani qanoq-una ilillutik taakkua iliusissanut pilersaarutit qulakkeerneqarsinnaasut sananeqarnissaat”.
