Kommunit akiliisinneqarsinnaapput

Kisianni Namminersornerullutik Oqartussat, 1989-imili akisussaalermatali, kommuninik suli akiliisitsisoqanngitsoq, Namminersornerullutik Oqartussani avatangiisinut immikkoortoqarfimmi pisortaq, Tina Kreutzmann Petersen, oqarpoq.

- Nalunaarut atuuttoq naapertorlugu, eqqakkat peernersinnaapput, eqqaavissuarnut inissinnerisigut imaluunniit ikuallaavikkut ikuallannerisigut. Aamma periarfissat taakkua akuleriisillugit atorneqarsinnapput, ikuallassinnaasut ikuallaavikkut ikuallallugit, ikuallassinnaangitsullu eqqaavissuarmut inissillugit, Tina Kreutzmann Petersen oqarpoq.

Tassalu eqqaavissuup ikuallatsinnissaa inerteqqutaasoq, taassuma oqaatigaa. Akunnaami Ikerasaarsummilu eqqaaviit ikuallatsinneqartartut oqaluttuupparput, aperalugulu, taava qanoq iliorsinnaanersut.

- Eqqakkat pillugit nalunaarummi iliuuseqarnissamut periarfissaqarpoq. Tassa kommunit akiliisitaasinnaapput.

Kisianni Avatangiisinut immikkoortoqarfimmi pisortap ilisimasai naaperorlugit suli akiliisitaasoqarsimanngilaq.

- Eqqaavissuarmik ikuallaasoqarpat, taama siunertaqartaoqartoq uppernarsarsinnaasariaqarparput. Takusaqaruttali, kommunimiit oqaannarsinnaapput, eqqaavissuaq nammineerluni ikuallalersimasoq.

Kukutsisoqartoq takugutsigu aatsaat uppernarsaatissaqalissaagut.

- Kisiaanni nakkutilliiartorluta angalasarnitsinni naapertuutinngitsumik suleriaaseqartoqartoq pasisaqartutta, taava peqqussusiortarpagut, tamakkualu malinniarneqartarput, Namminersornerullutik Oqartussani avatangiisinut immikkoortoqarfimmi pisortaq, Tina Kreutzmann Petersen, oqarpoq.