Kommunit aaqqissuunneqaqqinnissaat ataatsimiinnermi qitiutinneqartoq
Kommunit kattuffiata, KANUKOKA-p, ukioq manna aallartitaasa ataatsimeersuarnissaat ammaanersiorneqarmat kommunit aaqqissuunneqaqqinnissaat qitiutinneqarpoq.
Kommunit pitsaanerusumik iliuuseqassappata uagut naalakkersuinermik suliaqartut periarfissiinissarput pisussaaffigaarput, naalakkersuisut siulittaasuat Hans Enoksen ullumi KANUKOKA-p ataatsimeersuarnerani oqaaseqarnermini taamatut oqarpoq.
Taamaalilluni naalakkersuisut siulittaasuata kommunit aaqqissuunneqaqqinnissaanik oqallinneq aallarnerpaa –kommunit aaqqissuuteqqinnissaanut ataatsimiititaliap ataatsimeersuarnermi suliaminik saqqummiussinerata kingorna oqallissutaasussaq aallarnerluaannarpaa.
KANUKOKA-p siulittaasuata Jens Lars Fleischer-ip taannarpiaq aallartitat ataatsimeersuarneranni matumani pingaarnerit ilaattut eqqartorneqarnissaa oqaatiginikuuvaa.
Hans Enoksenip oqalugiarnermini tikkuartorpaa siunissami kommunit aaqqissorneqarnissaat aningaasatigut iluaqutaasinnaanera kisimi pineqassanngimmat. Aammali nunatta isorartoqisup innuttaasullu akornanni pissutsit ilanngunneqartariaqartut oqaatigaa. Inuullu qitiutinneqarnissaa pingaaruteqarluinnartuuvoq, naalakkersuisut siulittaasuat oqarpoq.
Kommunit nutaat namminersornerullutik oqartussat suliaannik arlalissuarnik tigusisussaammata kommunit imminnut napatissinnaanissaat pisariaqarpoq.
Nunatsinni kommunit 18-usut kommuninut sisamanut angisuunut ataatsimuulersinneqarnissaat Aaqqissuusseqqinnermi Ataatsimiititaliap siunnersuutigaa. Tassungalu naalakkersuisut innuttaasut naalakkersuinermilu suliaqartut qanilaassuseqarnissaat pigaartillugu.
Suliassat sapinngisamik innuttaasut qanillugit aaqqinneqartarnissat kissaatigaarput, inatsisilerineq aningaasaqarnerlu iluaqutaasumik ingerlanneqassappata, Hans Enoksen oqarpoq.
Kommunini najukkani kiffartuussiviit mikisut allisarnerisigut kommunit ikinnerusut anginerusullu qanilaassuserlu ataatsimoortinneqarsinnaapput innuttaasullu pilertortumik eqqortumillu sullinneqartalerlutik.
Hans Enoksen KANUKOKA-p aallatitaasa ataatsmeersuarnerannut qaaqqusaavoq. Aningaasaqarnermut naalakkersuisoq Josef Motzfeldt aamma ilaqutariinermut naalakkersuisoq Tommy Marø aamma qaaqqusaapput.
