Kommunit 17-inngorteqqinneqarnissaat taperserneqanngitsoq

Nunatsinni kommuninik 17-inik pilersitseqqinnissamik partiip Nunatta Qitornaasa siunnersuutigisaa Sisimiuni qinersisartunik arfininngormat tv-kkut toqqaannartumik ataatsimiititsisoqarmat partiinit allanit aamma taperserneqanngilaq.
Allattoq Karsten Sommer
apriilip 09-at 2018 07:06
Nutserisoq Simon Uldum -

- Kommunit 17-it eqquteqqinnianngilagut, taamaalillutalu borgmesterit 17-it kommunalbestyrelsillu 17-it pilerseqqillugit, kommunit 17-it maanna tallimaannanngorsimasut pilerseqqinnissaannik Nunatta Qitornaasa saniatigut partiinit allanit sulissutigineqarusunnersoq qinersisartut ilaannit apeqqutigineqarmat, Siumumeersoq Erik Jensen taama oqarpoq.

Aamma Inuit Ataqatigiit isumaqarput nunatsinni kommunit tallimaasut maannattut.
 
Suleqatigiissitsisullu kommunit agguloqqinnissaat aamma kissaatiginngilaat.

AAMMA ATUARUK Nunatta Qitornaata kommuunit 17-inngorteqqikkusuppaat

- Kommunit kattussuunneqarnerinut 1 milliard koruunit tungaannut atorpagut, kommunillu aggulunneqaqqinneqassappata aamma 1 milliard koruunit tungaannut atoqqissavagut, Michael Rosing Suleqatigiissitsisuneersoq taama oqarpoq.
 
Tamannalu Atassutip, Partii Naleqqap Demokraatillu isumaqataaffigaat.
 
- Nunatsinni kommunit 17-inngoqqissappata nunatsinni allaffissornerujussuaq annikillisinneqarnavianngilaq. Naaggaluunniit, Atassummeersoq Siverth K. Heilmann arfininngormat qinersisartunik tv-kkut ataatsimiititsisoqarmat taama oqarpoq.