Kommunistit partiiat Beijingimi ataatsimeersuarpoq

Kinami naalakkersuisut qullersaat Qilammiorpaluttumik eqqissinerup illoqannginnersartaani naapikkaangata qarlortartoqartuaannarpoq. Kinap inatsisartui tassani marsip qaammataani naapittaraluarput, ukiorli manna immikkut pingaartorsiorfiuvoq, tassa kommunistit ukiut tallimakkaarlugit ataatsimeersuartarmata, sunissamilu aalajangersagassat pingaarnerit tassani oqallisigineqartarput pilersaarusiorneqartarlutillu. Ho Chin Tao sapaatip akunneri tallimat matuma siorna partiip allattuuneratut qinerneqarpoq, siornatigullu præsidentioreerami pissaaneqaqaaq. – Avammut ammanerusariaqarpugut ilisimatuussutsikkullu siuariartortariaqarluta, inooqatigiinnitsinnut tunngatillugu toqqissisimanartumik inuiaqatigiit ineriartortittariaqarpavut, naalagaaffittullu pisuutut ingerlalernissarput anguniartariaqarparput. Ho Chin Tao oqalugiarnermini qulequttat angisuut oqaluuserai, soorlu siuariartorneq siuariartorniaannarluni anguniarneqassanngitsoq oqaatigaa, pinngortitalli mingutsinneqannginnissaa aamma pingaartittariaqarmat. Qulequttallu ilagaat Kinami innuttat pissaqarnermikkut naligiinnerusumik atugaqartariaqarnerat, tassa kitaani illoqarfimmiut pisuujusut kangiani naasorissaasunut 800 millioninut pissaatikitsunut nallersuunnerulernissaat anguniarneqassasoq eqqartorpaa. Sanaartornikkut ineriartorneq mingutsitsinermik kinguneqartoq, aningaasarsiat naligiinngikkiartuinnarpata pikitsitsinerit aarlerinarmata. Aningaasarsiornikkut iluarsaassisoqarnissaa anguniarneqartoq oqarpoq, Taiwanimullu tunngatillugu oqarpoq eqqissinissamut isumaqatigiissusiortariaqarlutik. Ataatsimut isigalugu tassa partii namminneq naalagaaffimmik iluinnaaniunngitsoq aammali nunarsuaq ataatsimut isigalugu akisussaaffimmik tigusiniarneq erserpoq. Kitaanili demokratiitut aqutseriaaseq nalunngisarput malillugu ukiuni tulliuttuni tallimani eqqunniarneqanngilaq, Jan Larsen Beijingimiit nalunaarpoq.