Assi: Ignatiussen Abel

Kommunip, politiit Namminersorlutillu Oqartussat Tasiilaq pillugu suleqatigiinneq nutaaq aallartikkaat

Pisortani oqartussat assigiinngitsut suleqatigiilernerisigut Tasiilami meeqqat ataasiakkaat isumaginninnikkut sumiginnakkat pisortat tamarmik suleqatigiillutik malinnaavigisinnaalissavaat.

Kommuneqarfik Sermersooq, Kalaallit Nunaanni politiit aamma Namminersorlutik Oqartussat suleqatigiilerput, Tasiilami meeqqanik kinguaassiuutitigut atornerluisoqartarnerata pinaveersaartinneqarnissaannut iliuusissanik ataatsimoortumik aallartitsissallutik.  

- Meeqqat inuusuttullu Tasiilami kinguaassiutitigut atornerlugaasimanissaannik pasitsaassisoqarpat, taamaattoqarsimaneranilluunniit ilisimasaqaraanni taava pisortat qanimut akimut piaartumik naapeqatigiittalernissaat isumaqatigiissutigivarput.

Politiinut tunniunneqarsimasut ataqatigiissagaanerusumik, sumiiffimmi pisortat meeqqanut sullissinissaminnut suliamillu misissuinissaminnut illersuisinnaanissaat pitsanngorsarneqassasoq, Martha Lund Olsen nassuiaavoq.

Pineqartoq naatsumik
- DR-ip piviusulersaarutaa "Byen hvor børn forsvinder" Tasiilamut tunngassuteqarpoq.
- Tasiilami meeqqat pingasuugaangata ataatsip kinguaassiutitigut atornerlugaasimasarnera meeqqallu marluugaangata ataatsip kommunip isumaginnittoqarfianut suliassanngortinneqarsimanera piviusulersaarummi saqqummiunneqarpoq.
- Piviusulersaarutip kingunerisaanik Tasiilami nunattalu sinnerani isumaginninnikkut ajornartorsiutit kingumut oqallissaaqqilerput.
- Illuatungiliuttut partiillu tapertaasut Demokraatit aalajangiiffigisassatut siunnersuummik pingasunngormat saqqummiussipput: Naalakkersuisut isumaginninnikkut ikiorneqarnerunissamik Danmarkimut noqqaassuteqarnissaart piumasaqaatigaat. - Taamatut piumasaqaateqartoqarnera Naalakkersuisut mtaasinngornermi maajip 27-ani akueraat.

 

AAMMA ATUARUK Immikkoortortaqarfimmi Tasiilami pisortap suliniut ilassilluaraat

Ullumikkut unnerluussisussaatitaaneq nuna tamakkerlugu pisussaaffioreerpoq, uanili isumaqatigiissutip allaanerussutaa pisortap ima nassuiarpaa:

- Uani uku pisussaasussangussapput peqqinnissaqarfik, immikkoortortaqarfik, politiit isumaginnittoqarfillu pinngitsoornatik naapitassapput, isumaqatigiillutillu qanoq suleriaqqinnissaminnik, Martha Lund oqarpoq.

 

Ilinniartitsisoq Danmarkimut angerlartoq

Danmarkip Radioata piviusulersaarutaata "Byen hvor børnene forsvinder"-ip aallakaatinneqarnerata kingorna Tasiilaq oqallissaaqqilerpoq. Tasiilami meeqqat pingasuugaangata ataatsip kinguaassiutitigut atornerlugaasimanera, meeqqallu marluugaangata aappaata kommunimut suliassanngortinneqarsimanera piviusulersaarummi oqaatigineqarpoq.

Ilinniartitsisoq danskiusoq Rikke Blegvad piviusulersaarummi aamma malittarineqarpoq. Taanna politikkikkut akisussaasunut pissutsit pillugit erseqqissaateqartaraluarpoq iluatsinngitsumilli.

AAMMA ATUARUK Martha Abelsenip Tasiilaliarnissani aalajangiusimagaa

Taanna Tasiilami alivarpimmi ukiuni arfinilinni ilinniartitsisutut sulivoq, ukiunilu taakkunani Tasiilamiinnermini meeqqat inuuniarnermikkut ilungersuuteqartut arlallit ilisarisimasarai. Piviusulersaarummi saqqummiunneqartut malillugit Tasiilami meeqqat pingasuugaangata ataaseq kinguaassiutitigut kanngutsaaatsuliorfigineqartarpoq, meeqqallu marluugaangata ataaseq kommunimi isumaginnittoqarfimmi suliassanngortinneqarsimasarpoq.

Tasiilami kinguaassiuutitigut innarliinerit

Tasiilami pigisaanilu kinguaassiuutitigut pinerliinerit ukiut pingasut kingulliit ingerlaneranni 193-it nalunaarutigineqarput.

Meeqqanut kinguaassiuutitigut atornerluinerit 20-t siorna nalunaarutigineqarput.

Tasiilami pigisaanilu meeqqanut kinguaassiuutitigut pinerluttuliornerit 15-it maanna suliarineqarput.

Meeqqat illersuisuata aamma nalunaarutigaa nalunaarutigineqarsimanngitsut amerlasoorujussuusut.Agguaatigiissillugu meeqqat pingasuugaangata ataaseq kinguaassiutitigut atornerlugaasarpoq, meeqqallu marluugaangata ataaseq kommunemi isumaginninnikkut suliassaasarpoq.

Rikke Blegvad ullumikkut Danmarkimut uteqqinnikuuvoq, taanna ukiuni arfinilinni Tasiilamiinnermini ilungersorluni allanngueqataarusukkaluarpoq meeqqat inuunerat pillugu, ukiunilu taakkunani susoqarsimanngilaq, tamannalu Rikke Blegvadimut sakkortuallaalersimavoq.

Politiit borgmesterilu nuannaarutigigaat

Isumaqatigiissut 2018-imi aallartisarneqarpoq. Suleqatigiinnissaq Tasiilami meeqqat inuusuttullu atugarisaasa pitsanngorsarneqarnissaannut alloriarneruvoq. Taassumalu nunatta sinnerani aamma atorneqarsinnaalernissaa Peqqissutsimut, isumaginninnermut inatsisinillu atuutsitsinermut naalakkersuisumit, Martha Abelsenimit neriuutigineqarpoq.

Isumaqatigiissutip siuariaataanissaa Kommuneqarfik Sermersuumi borgemesterimit naatsorsuutigineqarpoq.

- Suliassaqarfik ukkatariuassavarput ataatsimoorussamillu patajaallisakkamik suleqatigiinnitsigut eqqortumik   sammiveqarluta  ingerlalerpugut. Meeqqanut inuusuttunullu navianartumiittunut pitsaaqutaasumik ataatsimoorluta sullissinerulissaagut. Siunissami suleqatigiinnissarput qilanaaraara, taanna oqarpoq.

Kalaallit Nunaanni politimesterip Bjørn Tegner Bayip isumaqatigiissut aamma nuannaarutigaa. Taassumalu neriuutigaa meeqqat ikiorneqarnertik illersorneqarnertillu malugissagaat paasillugulu.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat