Kommunip pingasunngorlugu avinneqarnissaa kaammattuutigaat
Qaasuitsup Kommunia pingasunngorlugu avinneqassaaq. Kommunalbestyrelsip ullumi sisamanngornermi ataatsimiinnereerluni tamanna kaammattuutigaa.
Allattoq Walter Turnowsky, Simon Uldum
Nutaatulli kommuninngorumaartussani illoqarfiit sorliit pingaarnertut illoqarfiussanersut politikerit aalajangerumanngikkallarpaat.
Kommunip avinneqarnissaa pillugu marsip qaammataani isummerfiusussamik innuttaasunik taasitsisoqarnerata, amerlanerussuteqartullu 81 %-iusut akuerisaata malitsigisaanik taama aalajangertoqarpoq.
Kommunalbestyrelsili taamatut aalajangiussaqaraluartoq, tamanna kommunip pingasunngorlugu avinneqarnissaanik isumaqanngilaq. Kommunili ilumut avinneqassanersoq, avinneqassagaluarpallu qanoq avinneqassanersoq Inatsisartut aalajangertussaavaat.