Kommunip karsia imaaruttarpoq

Kommune Kujallermi suliffissaaleqisut massakkut 600-it sinneqarput. Suliffissaaleqisut aamma meeqqanik angerlarsimaffiup avataanut inissiisarneq pissutaallutik inunnik isumaginninnermut aningaasartuutissatut missingersuutit 2 millioni koruunit sinnerlugit ukioq imaaliinartoq sipporneqareerput.

-Atorfilittat massakkut ulapputigaat paasiniarlugu qanoq iliornikkut pissutsit iluarsineqarsinnaasanersut, Kommune kujallermi borgmester Simon Simonsen oqarpoq. Suliffissaaleqisunik pikkorissaanissaq piviusunngortinneqarsinnaassasoq neriuutigineqarpoq.

Aningaasartuutissatut missingersuutigineqanngikkaluit aamma kommunip aningaasartuutigisariaqarsimavai. Assersuutigaa, Alluitsup Paani meeqqat atuarfiata oquttup 2,3 millioni koruuninik aninngaasartuutigineqarsimanera. Aamma feeriaqarnersiutit februaarip aallaqqaataata kingorna tunniunneqarmata kommunip karsia imaarussimagaluarpoq.

Pissutsit suli qaammatini sisamani taamaakkallarnissaat naatsorsuutigineqarsinnaasoq, Simon Simonsen oqarpoq.

Naalakkersuisut pissutsit qanimut takusariaqarmatigit Naalakkersuisut siulittaasuat tikeraaqqusissummik apuussiffigalugu, Simon Simonsen-ip aamma oqaatigaa.

Ilanngutassiaq unnugu Qanoruumi takuneqarsinnaavoq.