Kommunip karsia imaarutigajattoq
Qaasuitsup Kommunia januaarip ulluisa 26-ani kommunimi sulisunut aningaasarsisitsinissaminut aamma utoqqalinersialinnut inunnillu isumaginninnermi tigusartagalinnut tunniussinissaminut ulluliisimavoq. Kisiannili ulloq taanna sioqqullugu kommuni tunniussinissaminut aningaasanik 9,5 millioni koruunit missaannik amigartooruteqarluni.
- Tamatumunnga pissutaavoq Namminersorlutik Oqartussat siumoortumik akileraarutitigut tunniussassaat 34 millioni koruunit januaarip 25-ata 26-atalu akornanni unnuakkut nuunneqartussaammata, Qaasuitsup Kommuniani aningaasaqarnermut pisortaq, Allan Hjort, Kristian Jeremiassenimut akissuteqarluni allappoq.
Kommunimiillu aningaasaqarnikkut erloqinartorsiorneq nassuerutigineqarpoq:
- Kommuni tigoriaannatigut oqimaattorsiorpoq. Ullumikkoqqissaaq apeqqutaalluinnartarpoq Namminersorlutik Oqartussaniit akileraarutitigut siumoorutit kommunimut nakkartinneqartarneri kommunimi akiligassat qaangiisoortinnagit, Allan Hjort Kristian Jeremiassenimut akissummini allappoq.
Aningaasaqarnermut pisortap ilanngullugu nassuiarpaa kommunimi aningaasat tigoriaannaat januaarip 28-ani 14,9 millioni koruuniusimasut. Tassa aningaasarsisitsinereernerup, utoqqalinersiutinik inunnik isumagininnermilu ikiorsiissutinik tunniussaqareernerup kingorna aammalu Namminersorlutik Oqartussaniit akileraarutitigut isertitat tigoreernerini.
