Kommunip inuttani PBS-imik atuequai

Qaasuitsup Kommuniani innuttaasut akiitsui 166 millionit koruuniupput. Tamatuma assigaa kommunimi innuttaasut ataasiakkaat tamarmik, meeraaqqaniit utoqqarsuarnut 9.300 koruuninik akiitsoqartut.
Allattoq Apollo Jeremiassen
aggustip 17-at 2010 05:31

Akiitsut amerliartuinnarnissaat pinaveersaarniarlugu, innuttaasut amerlanerusut aningaaseriviit akiligassanik isumaginniffiannut PBS-imut ilanngunnissaat, kommunip kissaatigaa.

- Akiligassanik isumaginniffimmut PBS-imut ilanngukkaanni, akiligassanik akiliiartornissaq piffissaqarfiginngikkaluaraanniluunniit akiligassat akilerneqartarput, innuttaasunik sullissinermi pisortaq Betina Hansen Kristiansen oqarpoq.

Aningaaseriviit akiligassanik isumaginniffiat, innuttaasunut kommunimullu iluaqutaavoq: Akiligassat allakkatigut nassiussorunnaarlugit akiligassanik isumaginniffimmit isumagineqalerpata, innuttaasut akitsuutinik akiliinikinnerusalissapput kommunilu allaffissornikkut ileqqaagaqassalluni.

Taamaattumik akiligassanik isumaginniffimmik PBS-imik atuinissaq Qaasuitsup Kommunianit innuttaasunut paasisitsiniutigineqarniarpoq. Tamanna ilaatigut kommunip karsiini sulisunit innuttaasut aaqqissuussinermut ilanngunnissaat kajumissaarutigineqartassaaq, ilaatigullu kommunip nittartagaatigut paasisitsiniutigineqassalluni.

Aamma kommunip sulisui akiligassanik isumaginniffimmik atuilernissaannik kajumissaarneqassapput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq