Kommunip innarluutilimmut tunngatillugu suliap isornartorsiorneqarnera akerlileraa

Magdaline Langep ernera innarluuteqarami ulluinnarni tapersersorteqarnissamik pisariaqartitsivoq.

Kommunip suliaq eqqortumik isumagisimagaa Kommuneqarfik Sermersuumi meeqqanut inuusuttunullu ingerlatsivimmi pisortaq, Martha Lund Olsen oqarpoq.

Magdaline Langep pakatsisimanera Martha Lund Olsenip paasisinnaanerarpaa, kommunilli suliami tassani eqqunngitsumik iliuuseqarsimaneragaanera illuatungilerpaa.

- Kommunip suliaq eqqortumik suliaraa, Martha Lund Olsen oqarpoq.

AAMMA ATUARUK Ilaqutariit Langekkut kommunimut ilungersuuteqarnerminni tunniutiinnartut

Suliffik pilerinarsaruminaatsoq

Kommunimillu tapersersorteqartitsiniarneq ataatsimut isigalugu ajornartorsiutaasoq nassuerutigaa. Taassumali sulisussaaleqineq ullumikkut ajornartorsiutaaqisoq eqqaasitsissutigaa, Nuummilu suliffissarsiortut amerlannginnerat assersuutigalugu.

- Taamaattumik ilinniarsimanngitsut oqinnerusunik artornarpallaanngitsunik suliaqarnissaminnut immaqa nuuttarput.

Martha Lund Olsenip perorsaasut amigaataammata suliffissaaleqisullu ikimmata kommunip tapersersortit ilinniarsimanngitsut atortariaqartarai nassuiaatigaa.

Tapersersortillu ilinniarsimanngitsut suliffimmiitiinnarniarnerat ajornakusoortarpoq.

- Tapersersortitut sulineq imaannaanngitsorujussuugami artoraangamikku allamik aamma suliffissarsiortaramik.

Martha Lund Olsen naapertorlugu kommunip sulinerani atugassarititaasut allanngortittariaannaanngillat.

Tapersersortitummi atorfiit pilerinarsarnissaannut kommunip periarfissaqarnerat ajornartorsiutit qiteraat. Assersuutigalugu kommunit tapersersortit ilinniarsimanngitsut akissarsiassanut isumaqatigiissutini minnerpaaffissat malillugit taamaallaat akissarsiaqartinneqarsinnaapput.

- Kommunimi tassunga tungaatigut soorunami immikkut iliuuseqarsinnaanngilagut, tamakku isumaqatigiissutit avaqqullugit iliuseqarsinnaannginnatta.

AAMMA ATUARUK Innarluutillit illersuisuata isornartorsiuinera kommuninit isumaqatigineqanngilaq

Kommuneqarfik Sermersuup Tasiilami innarluutilinnut susassaqarfimmi sulisut pigiinnarniarlugit iluaqutissanik, assersuutigalugu aqqutissiuussinernik, misileraasimavoq. Suliniulli tamanna ajornartorsiummut iluaqutaasimanngitsoq, Martha Lund Olsenip oqaatigaa.