Kommunip ingerlataani akit qaffassapput
Akissarsiaqqortuut meeqqerivinnut akiliutaasa qaffannerisigut kiisalu illoqarfinni eqqaavilerinermut anartarfilerinermullu akiliutit qaffannerisigut aningaasat isertinneqassapput.
- Eqqaavilerineq nunaqarfinni illoqarfinnilu assigiinngitsumik akeqarsimasoq, massakkut nunaqarfinni akisunerusimagaluartoq, taanna iluarsiivigivarput, illoqarfinni qaffanninngorlugu.
Meeqqeriviit akii aamma nalilersorneqarput, kommunalbestyrelselu isumaqatigiilluni aalajangerpaa, 450.000 koruuniniit qummut isertitallit akitsuiffigineqalaarnissaat, borgmester Jess Svane kommunip ingerlataani akit qaffanneqartussat pillugit oqarpoq. Taamaalilluni naatsorsuutigaa kommunip ingerlataani akit qaffannerisigut aningaasat 6,9 millioni koruunit isertinneqassasut.
Akit qaffannerisa saniatigut allaffissornikkut 22 millioni koruuninik aningaasartuutikillisaasoqassaaq.
- Ulluinnarni sullissinitsinni taamatut sipaaruteqarneq sullitatsinnit malugineqarnissaa qularivara.
Allaffissornermi qanoq inuttaqartiginerput siunissamilu qanoq inuttalersuisinnaaneq sipaarniarfigineqarput. Inuttalersuineq massakkut aallavigalugu inuttassarsiorneqaraluartut unitsikkallarpagut, nalimmassaanikkullu tamakku aaqqissuunneqartussaapput. Sapinngisannguarpullu tamaat atorlugu innuttaasunik sullissinitta ajorseriarfiginngisaanik.
Kommunimut akileraarut procentimik ataatsimik 2011-mi qaffanneqassaaq, tassa akileraarutit katillugit 45 procentinngussallutik. Qaasuitsup kommuniani aningaasaqarneq nunatta aningaasaqarneratulli ilungersunartumik inissisimasoq, borgmester Jess Svane tusagassiutinut nalunaarummini allappoq. Sipaarutit, akinik akileraarutitigullu qaffaanerit
Akiitsunut akilersukkanut sanaartornissanullu atorneqassapput.
