Qaasuitsup Kommuniani kommunalbestyrelsimi ilaasortap Kristian Jerimiassenip kommunip marlunngorlugu avinneqarnissaa kommunalbestyrelsimi novembarimi siunnersuutigaa.
Kristian Jerimiassenip siunnersuutaa kommunalbestyrelsimi aasamut eqqartorneqartussaagaluarluni Qaasuitsup kommunianit aappaagu eqqartorneqartussatut kinguartinneqarpoq.
Kommunip marlunngorlugu avinniarneqarnera sumiiffimmi aallartitanit isumaqatigineqarpoq akerliuffigineqarlunilu.
- Soorunami ataatsimiittarfimmi aalajangernerit atuutsinneqartussaapput, taannalu allanngortinneqarsimammat naammaginngilara kommunalbestyrelsimullu ingerlateqqillugu, aalajangiineq taanna atuutiinnaqqullugu 2012-imi aningaasaliissutissatut missingersuutit eqqartulerutsigit sammineqartussanngorlugu, Kristian Jerimiassen oqarpoq.
Qaasuitsup kommuniata marlunngorlugu, tassa Qaanaamiit Uummannaq tikillugu aamma Qeqertarsuup tunuata immikkortilerlugu avinneqarnissaa Qaanaameersup Jens Danielsenip Qaasuitsup kommuniani sumiiffinni sinniisuutitap isumaqatiginngilaa.
- Qaasuitsup kommuniani suliassat suli tamakkiisumik naammassinnginnatsigit isumaqatiginngilara. Suli naammassisutut misiginnginnama, aaqqitassarpassuit aaqqeqqaartariaqaratsigit, Jens Danielsen oqarpoq.
Qaasuitsup Kommuniani sumiiffimmi sinniisuutitaq Upernavimmeersoq Jens Immanuelsen Kristian Jerimiassenip siunnersuutaanut isumaqataavoq.
- Kommunalbestyrelsimut ilaasortap saqqummiussimasaa aamma najugaqartut oqariartuuteqartarneri, kommunerujussuup angivallaaralugu, marlunnut avinneqarnissaa pissusissamisuussaaq. Kommunip marlunngorlugu avinneqarnissaa innuttaasunut isumasiuissutigalugu tusarniaavigineqarnissaa pisariaqarpoq, Kommunip ilusaanik allanngusinnaaneq tunngavigalugu, Jens Immanuelsen oqarpoq.