Kommuninut tapiissutissat ilimagisamit ikinnerupput

Kommuninut ataatsimoortumik tapiissutissat 2011-imut atuuttussat isumaqatigiiissutigineqarnerat Aningaasaqarnermut Naalakkersuisumit Palle Christiansenimit Kanukoka-llu siulittaasuanit Enok Sandgreen-imit atsiorneqarpoq.
Allattoq Jaaku Lyberth
novembarip 09-at 2010 16:34

2011-imi ataatsimoortumik tapiissutissat 741 millioni koruuniussaput. 2010-mi tapiissutinit 48,3 millioni koruuninik ikinnerullutik.

Isertitanit tamakkiisumik akileraarutit nunatta avataaniit suliartortartut akileraartalernissaannik siunnersuut saqqummiunneqarmat Naalakkersuisut Kanukoka-llu akornanni isumaqatiginniarnerit aaqqiagiinngiffiupput.

Ukiumoortumik ataatsimoortumik tapiissutit Namminersorlutik Oqartussat kommunillu akornanni isumaqatigiinniutigineqartarneranni, isertitanit tamakkiisunit akileraarutit, ilaatinneqartalissasut, illuatungeriit isumaqatigiissutigaat. Tamaalillutik aamma kommunit soorlu aatsitassarsiornermi suliniutaasunut aningaasartuutissaat isersitanit tamakkiisunit akileraartarnermi matussutissaqartalissapput.

Illuatungeriit ullumi isumaqatigiissummik atsioraluarlutik kommuninut ataatsimoortumik tapiissutit aappaagumut tapiissutigineqartussat 8 millioni koruuninik ikilisinneqarsimanerat isumaqatigiinngissutaavoq.

Illuatungeriit isumaqatigiinnginnerat nittartakkami www.nanoq.gl-imi atuarneqarsinnaavoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq