Kommuninut qinersineq
Inatsisartunummi qinersinermi piumasaqaatit akerlerluinnaanik kommunalbestyrelsimut qinersinermi kalaallit inuusuttut Danmarkimi ilinniareerlutik utertut taasisinnaatitaapput, soorlu aamma nunami allamiorpassuit Nunatsinni najugaqartut kommunalbestyrelsimut ullumi qinersisinnaatitaammata.
Kommunalbestyrelsinummi qinersisinnaanermut piumasaqaataavoq Qallunaat Nunaata Naalagaaffianut innuttaanissaq, imaluunniit Naalagaaffimmi minnerpaamik ukiuni pingasuni aalajangersimasumik najugaqarsimanissaq.
Tamatuma saniatigut piumasaqaataavoq qinersinissaq sioqqullugu Nunatsinni qaammatini arfinilinni najugaqarsimanissaq. Taamatullu aamma kommuni taasivigisassaq qinersinissaq sioqqullugu sapaatip-akunnerini arfinilinni najugaqarfigineqareersimassaaq.
Taamaattumik Filipinerit Qallunaat Nunaata Naalagaaffiani ukiuni kingullerni pingasuni najugaqarsimasut, taakkunanngalu qaammatini kingullerni arfinilinni Nunatsinni najugaqarsimasut, kommunalbestyrelsinut qinersisinnaatitaapput.
Taakkua saniatigut aamma nunaqqativut Nunatta avataani ilinniariarsimanertik imaluunniit napparsimanertik pissutigalugu avalaqqareerlutik angerlarsimasut, aapparisatik peqatigalugit taasisinnaatitaapput.
Taakkununngali piumasaqaatituaavoq avalannginnerminni minnerpaamik Nunatsinni inuit nalunaarsorsimaffiini ukiuni marlunni nalunaarsorsimareersimanissaat.
