Kommuninut qineqqusaarneq paasissutissanit allanit ipisinneqarpoq
Sooruna Inatsisartunut qinersinissaq taamarsuaq sammivisiuk kommuninullu qinersinissaq sammerpiarnagu? Sammisarpassuit pissanganartut allaaserineqarsinnaasut, radiokkut tv-kkullu ilanngutassiarineqarsinnaasut qaqinneqaraluarput. Kisianni taama pisoqanngilaq, taamaammat qinersisartut paasisaqarsimanatik apriilip aappaani qinersisussanngoratarsinnaapput.
-Sammisat innuttaasunut qanittut saneqqutiinnarneqarput, taamaalisoqarneranilu qinersisartut salloqunaveeqqutitullusooq tiguneqarlutik. Najukkaminni tamat oqartussaaqataanerannut pingaarutillit pillugit paasissutissanik naammattunik apuussivigineqanngillat. Aningaasaqarneq qanoq inissisimava, kommunit iluarsartuuteqqinneqarnerisa kingorna pissutsit iluamik ingerlasimappat? Najukkami pissutsit pingaarutillit pillugit naammattumik paasissutissiisoqanngilaq, taamaammat qinersinermi matumani qinersiartortut aatsaat taama ikitsiginissaat annilaangassutigaara, Nikoline Ziemer, IA-p Nuummi immikkoortortaqarfiani siulittaasoq oqarpoq.
Tusagassiorfiit nukippassuit atorlugit Inatsisartunut qinersineq sammivaat, Naalakkersuisullu kikkuussanersut suli nalunaarutigineqanngimmat qinigaasullu Qinigaanerup Misilinneqarnissaanut Ataatsimiititaliamit suli akuerineqarsimanngimmata kommuninut qinersinerup ulluni tullinnguuttuni sammineqarnissaa ilimananngilaq.
-Nunatsinni illoqarfiit pingaarnersaanni qinersisartunik ataatsimiisitsinissamut qinersisartunik katersuisoqarsinnaannginnera aamma akueriuminaappoq. Tusagassiorfiit qasoqqasutut isikkoqarput, qinersisartullu politikkikkut paasissutissanik qatsussisimagunarlutik kommunimut qinigassanngortittut qinersisartunik ataatsimiisitsineri orninnagit kangerlummut angalarusunnerugunarput imaluunniit upernarpalaarnerani pisuttuarusunnerullutik. Najukkami tamat oqartussaaqataanerat navianartorsiortinneqarpoq, aamma qinersisartut tusagassiorfinnit paasissutissanik naammattunik tunineqannginnertik pissutigalugu kingullermik qinersinermi qinikkaminnik qinersiinnaratarsinnaapput, Nikoline Ziemer knr.gl-imut oqarpoq. Aammattaaq nassuerutigaa qineqqusaartut kommunimi politikkikkut oqariartuutiminnik tunniussaqarnissaminnut pikkorinnerusariaqaraluartut, tamannalu 2013-imi najukkami tamat oqartussaaqataaneranni atugassarititaasunik oqinnerulersitsinngitsoq.
