Kommuninut nuunneqartussat kinguarsarneqartariaqanngillat
Aaqqissuusseqqinnermut ataatsimiititaliaq eqaallisaanikkut periarfissanik arlalinnik tikkuaavoq, oqaatigalugulu taamaaliornikkut kommunit aamma Namminersorlutik Oqartussat 220 millionit koruunit angullugit ileqqaaruteqarsinnaassasut. Taamaattorli ileqqaarutit anguneqassappata, ingerlatsinikkut sanaartornikkullu suliassat annertunerusumik kommuninut nuunneqarnissaat pisariaqarpoq.
Inatsisartut Aningaasaqarnermut ataatsimiititaliaata Kommuneqarfik Sermersuumi aningaasaqarnermut ataatsimiititaliaq sapaatip akunnerani matumani ataatsimeeqatigaa, ataatsimiinnermilu kattussuunnermi killiffiit ilisimatitsissutigineqarput. Tamatumunnga atatillugu Asii Chemnitz Narupip suliassat sinnerisa tunniunneqarniarnerisa kinguarsarneqartuarnerat isumakulunnartoqartippaa.
Aningaasaqarnikkut iluanaarutissaq anguneqassappat, suliassat Namminersorlutik Oqartussanit kommuninut kinguarsarneqaratik tunniunneqarnissaasa ingerlaannarnissaat pingaaruteqartoq, Kommuneqarfik Sermersooq isumaqarpoq, tamatumunngalu atatillugu Kommuneqarfik Sermersooq akisussaaffimmik tigusinissamut piareersimavoq. Soorlu innarluutilinnik isumaginninnerup aamma ulloq unnuarlu angerlarsimaffiit sanaartornermullu tunngasut tigunissaannut. Tamatuma kingunerissavaa eqaannerusumik allaffissornikkut isumaginninneq imminnullu ataqatigiissaakkanik iluarsartuussinerit.
Asii Chemnitz Narupip neriuutigaa, Inatsisartut aningaasaqarnermut ataatsimiititaliaanik ataatsimeeqateqarnikkut ilisimalikkat paasisallu tunngavigalugit, iluarsartuusseqqinnerup piviusunngortinnissaanut pilersaarutit pillugit, Namminersorlutik Oqartussanit isumaqatigiinniartoqarumalissasoq.
