Kommuninut ataatsimoortumik tapiissutit isumaqatigiinniutigineqarnerat unitsinneqarput
Kommunit aningaasaqarnerannut apeqqutit Naalakkersuisunillu siunnersuutigineqartut isumaqatigiinniutaagaluarput, nunaqarfiit pillugit Ilulissani ataatsimeersuarnerup nalaani.
Kommunit akornanni qanoq annertutigisumik qanorlu ilusilikkamik nalimmassaasoqarnissaa, isumaqatigiinniaqataasut akornanni assortuussutaasoq, Aningaasaqarnermut Nunamullu Namminermut naalakkersuisup, Vittus Qujaukitsup tusagassiutinut nalunaarummini isertuutinngilaa.
- Isumaqatigiinnginneq pissusissamisuuginnarpoq, Vittus Qujaukitsoq allappoq imalu nangilluni.
- Aningaasarpassuit pineqarput, kommuneqarporlu aningaasanik kommuninut allanut nuussisariaqartussanik, Vittus Qujaukitsoq allappoq siunnersuutigalugulu kommunit ataasiakkaarlugit qaammatini tulliuttuni marlussunni isumaqatigiinniutigineqarnissaat, siunnersuutigalugulu augustip aqqarnganni ataatsimiinnermi isumaqatigiissusiortoqassasoq.
Vittus Qujaukitsup taamatullu KANUKOKA-p ataatsimoorlutik tusagassiutinut nalunaarumminni ilanngullugu allaaseraat, innuttaasut sullinneqarnerinut tunngatillugu, pisortat allaffissiorneranni nutarterinermi sulianut kommunit tamarmik tapersersuimmata.
Kommuneqarfik Sermersuup borgmesteriata, Asii Chemnitz Narup-ip oqaatigaa, Ilulissani ataatsimiinnerup nalaani isumaqatigiinniarneq tukattumik ingerlanneqartoq aamma kommunit Namminersorlutillu Oqartussat akornanni aaqqiissutissamik iluartumik isumaqatigiittoqarsinnaanissaa qularalugu oqaatigalugu.
Kommunit akornanni nalimmassaanermut tunngasut arfineq marluusut iluarsineqarnissaat siunertaralugu isumaqatigiinniarneq ingerlanneqarsimagaluartoq, Asii Chemnitz Narup-ip ilanngullugu oqaatigaa, taamaattorli ataasiinnaq naammassineqarsimasoq oqaatigalugu, tassalu komminit ataatsimut akileraarutaata 6 procentiusup atorunnaarsinneqarnissaa taamaallaat isumaqatigiissutaasimasoq oqatigalugu.
Kommuneqarfik Sermersuumi kommunalbestyrelse-p nalimmassaanermut apeqqut juunip aappaanni ataatsimiinnerminni eqqartortussaavaat.
- Uannut pingaaruteqarpoq, isumaqatigiinniarnerup tukattup aamma toqqammavilersuutit Naalakkersuisunit tigusagut, kommunalbestyrelsemi ilaasortanit tamanit tusarneqarnissaat, Asii Chemnitz Narup oqarpoq-
