Kommuninut ataatsimoortumik tapiissutit inissipput
Aningaasaqarnermut naalakkersuisup, Palle Christiansenip, aamma Kalaallit Nunaanni Kommunit Kattuffianni, KANUKOKA-mi, siulittaasup, Enok Sandgreenip, isumaqatigiissut ullumi atsiormassuk tamanna pivoq.
Palle Christiansenip Enok Sandgreenillu ullumi atsioqatigiinnerat annerusumik allanngortitsissanngilaq. Kommuninut ataatsimoortumik tapiissutissat, 789,3 millionit koruunit, Inatsisartut ukiarmi ataatsimiinnerminni aningaasanut inatsimmut atatillugu aalajangereerpaat.
Ataatsimoortumik tapiissutit tassaapput Namminersorlutik Oqartussat kommunit karsiinut ukiumoortumik tapiissutigisartagaat. Imaattaraluarpoq ataatsimoortumik tapiissutissat inisseqqaarlugit aningaasanut inatsisissaq akuersissutigineqartarluni, kisianni 2010-mut aningaasanut inatsisissaq Inatsisartuni amerlanerussuteqartunit akuersissutigineqartinnagu Naalakkersuisut KANUKOKA-lu ukioq-manna isumaqatigiissuteqarsinnaasimanngillat.
Isumaqatigiinnginnermut pissutaavoq ataatsimoortumik tapiissutit 30 millionit koruuninik ukioq-mannamiit ikilisussaanerat.
Tamanna naalakkersuisut naammagisimaarpaat. Kommunit allanngortiterneqarnerisa kingorna pisortat qinikkat ikilinerat pissutigalugu kommunit aningaasartuutaat ikinnerulerput. Kommunit isertitaasa ineriartortinneqarnerat Namminersorlutik Oqartussat isertitaasa ineriartortinneqanerannit pitsaaneruvoq.
Aammattaaq kommunini aningaasaqarnikkut ileqqaarutissat sukateriffigineqassasut Naalakkersuisut isumaqarput.
KANUKOKA-li ukioq manna ataatsimoortumik tapiissutinit 30 millioninik ileqqaruteqartoqaleriissasoq isumaqanngilaq. Allanngortiterinerup kingornagut aningaasaqarnikkut ileqqaarutissat suli takkutinngillat.
Akerlianilli kommunit killeqarfigisimasaat apeqqutaatinnagit aningaasat naligiissarnissaat akisunerusimavoq, taamaalillutillu innuttaasunik sullissineq allanngorani - apeqqutaatinnagu taakkua kommunit killeqarfiisa nutaat iluanni sumi najugaqarnersut.
Kommunit tamatuma saniatigut suliassanut Namminersorlutik Oqartussanit isumagineqartunut ukiumut 88,4 mio. kr.-inik akileeqataasut, KANUKOKA-mit oqaatigineqarpoq.
Maannali tassa isumaqatigiissut atsiorneqarpoq. Taamaalillutillu 30 mio. kr.-it peerneqarlutik, tassa ukioq manna.
KANUKOKA kommunillu ukiumut tulliuttumut isumaqatigiinniarnissat piaarnerpaamik aallartinneqarnissaat kissaatigaat, "taamaalilluni missingersuutitigut suleqatigiinnissaq piviusunngortinneqassammat", taama isumaqatigiinniarnermi oqaasertaliussaqarpoq.
