Ataatsimut isigalugu Kommuninni qinersineq ima inerneqarpoq

Kommuninut ippassaq qinersinerup kingorna Siumut kommunini pingasuni borgmesteriutitaqartussanngorpoq, Inuit Ataqatigiillu kommunini marlunni borgmesteriutitaqartussanngorluni. 

Borgmesteri ataasiinnaq borgmesteritut qinigaaaqqippoq, arnanillu pingasunik ukiuni tulliuttuni sisamani borgmestereqartussanngorpasilluni.

Ataatsimut isigalugu Inuit Ataqatigiit Demokraatillu nuna tamakkerlugu siuariarput. Qinersisut 4,6 procentii Partii Naleqqamik qinersipput, partiilu kommunalbestyrelsinut ilaasortaatitaqaqqaalerpoq.

Siumumulli taasisut ikileriarput, kingullermillu qinersisoqarneranut sanilliullugu 6 procentpointinik taasisikinnerulluni. Aamma Atassut kinguarialaarpoq.

Palle ajugaasoq

Siumup Qaasuitsoq avannarlermi ajugaanera tupaallannanngilaq, Palle Jerimiassenilu tassani taaguunneqarnerpaajugami borgmesterinngortussanngorpasippoq.

- Nuannaarpunga Siumumut taamatut annertutigisumik qinersisoqarsimammat kisianni ukua kisitsisit takutippaa tamakkiivittumik amerlanerussuteqanngitsugut taamaattumik partiinik oqaloqateqartariaqartut, taanna ingerlattariaqassavarput unnuaruna immaqalu aqagu taakku ulluni tulliuttuni, Palle Jerimiassen qarpoq.

Qinersisut 48,7 procentii Siumumik taasipput.

Angutit qaangerai

Qaasuitsoq kujallermi Inuit Ataqatigiit 44,5 procentiinit taaguunneqarput, Ane Hansenilu taaguunneqarnerpaajulluni.  Atassummik Demokraatinilluunniit suleqateqalersinnaaguni borgmesterinngussaaaq.

Akisussaaffimmillu tigusinissamut piareersimavoq.

- Tassa piareersimaffigilluinnarparput, tamatta ataatsimoorluta kivitsisinnaaneq taanna sivisoorsuarmik eqqartornikuugatsigu, aamma siammasissumik suleqateqarnissarput piareersimaffigivarput, Ane Hansen oqarpoq.

Qeqqata Kommuniani borgmesteri Berthelsenimik ateqaannassaaq. Tassalu Siumumeersoq Malik Berthelsen, 522-nit taaguunneqartoq, Hermann Berthelsenimut kingoraartinngortussaarpasippoq. Qinersisut affaat sinnerlugit Siumimik taasipput.

- Inuusuttuaraallungali annertuumik akisussaaffeqarneq sungiusimavara, tassa 20-nik ukioqarlunga namminersortunngorpunga, taavalu Inatsisartuni ilaasortaanikuuvunga, isumagalugu malillugu Inatsisartumik ajunngitsumik aamma sulisimallungalu takutitsimavunga, taamaammat aap akisussaaffiup tigunissaanut piareersimavunga, Malik Berthelsen oqarpoq.

Inuit Ataqatigiit Demokraatillu Kommuneqarfik Sermersuumi pissaaneqarnerulerput. Siumullu 7 procentpointinik kinguariarluni.

2254-init qinerneqartoq

Inuit Ataqatigiinneersoq Asii Chemnitz Narup qinersinermi uani taaguunneqarnerpaajuvoq, 2.259-init taaguunneqarluni. Demokraatit Narupimut tapersersuillutik nalunaarutigereerpaat, taamaammat borgmesterinngortussanngorpasippoq.

- Nuannaartorujorujussuuvunga, siullermik, suliakka nuannarigakkit, aamma suleqatikka kommunalbestyrelsemi innuttaasunik qanimut suleqateqartuarnikkut immersorneqartarnera taavalu siunnissat ataatsimoorluta tikkuarsinnaasaratsigit taamaattumik borgmesterinngoqqinnissara qilanaarutigivara, assorujussuaq, Asii Chemnitz Narup oqarpoq.

Kommune Kujallermi Siumumeersoq Kiista P. Isaksen 456-init taaguunneqarluni borgmesterinngortussanngorpasippoq. Tassalu parteeqatiminit Jørgen Wæver Johansenimit 212-init taaneqartumit Simon Simonsenimiillu 266-nit taaguunneqartumit taaguunneqarnerulluni.

-  Nanortalik, Narsaq Qaqortorlu minnerunngitsumik nunaqarfittagut tamarmik tikillugit ataasiusutut misigisilluta ingerlatsinissatsinni tamatta inuiaqatigiinni ataatsimoorluta ingerlatsiumaaratta, Kommune Kujallermi borgmesterinngortussanngorpasittoq, Kiista P. Isaksen oqarpoq.