Kommuninngortussani sisamani inuussutissarsiorneq nukittorsarneqassaaq
Destination Disko ukiortaamit Destination Avannaanngortussaq, Qaasuitsup Kommuneanit pigineqalissaaq.
- Tassani turisteqarneq kisiat ingerlannagu inuussutissarsiornerli siuarsaaffigalugulu ataqatigiissaarissaaq. Allannguutissat malunniuteqassaqaat, Palle Jeremiassen, ikaarsaariarnermi ataatsimiititaliami ilaasortaq oqarpoq, imalu assersuuteqarluni.
- Upernavimmi ullumikkut inuussutissarsiornermik suliaqartoq kisimiittorujussuusarpoq siunissamili kommunit arfineq-pingasunngorutta Destination Avannaani siunnersortit sulilerpata qitiusumik allaffeqarfimmut pisariaqartitsisut attaveqarsinnaalissapput. Illoqarfimmi allami misilittagalik imaluunniit siunnersorti attaveqarfigineqarsinnaalissaaq, nassuiaavoq.
Inuussutissarsiummik aallartitsiniartunut aningaasaliisarfik Greenland Venture aamma Nunatsinni Takornariaqarnermi Inuussutissarsiornermilu Siunnersuisoqatigiit GTE Destination Avannaani qitiusumik allaffeqarfimmut aamma peqataalertussaapput.
- Sullissineq eqaannerulertussaassaaq saaffiginnittullu sukkanerusumik sullinneqartalissapput suliarlu naammassillugu ingerlanneqarsinnaalissalluni, Palle Jeremiassen oqarpoq.
Taamaalilluni Destination Avannaata allaffeqarfia paasisanik katersuiffinngussaaq pisariaqartitsineq naapertorlugu tamanit iluaqutissanngortinneqassalluni.
