Kommuninngortuni suleqatigiinnissaq ataqqeqatigiinnissarlu pisariaqarput
Kalaallit Nunaanni kommunit kattuffiata – Kanukokap siulittaasuata – Enok Sandgreenip, ukiortaami oqaaseqaateqarluni erseqqissarpaa, ukioq nutaaq kommunit aaqqissuussaaneranni pissutsinut nutaanut iserfiusussaq suleqatigiinnissamik ataqqeqatigiinnissamillu immikkut pisariaqartitsiffiusussaasoq.
Allattoq Elisa Isaksen
decembarip 31-at 2008 17:25
Kommunit 18-iusimasut sisamaannanngorlutik kattunnerat aaqqissuussaanermillu iluarsaaqqinneq unammilligassaapput imaannaanngitsut, Kanukokap siulittaasua allappoq erseqqissarlugulu innuttaasut kiffartuunneqarnerata pitsanngorsarneqarnissaa pisariillisarneqarnissaalu aaqqissuussaanermik iluarsaaqqinnermi kommunit kattussorfigisaanni siunertat pingaarnersarimmassuk.
Piareersarnermut nukippassuit atorneqareersimagaluartut suut tamavimmik ullormi siullermi aaqqereersimanissaat naatsorsuutigissallugu piviusorsiornerussanngilaq, Enok Sandgreen allappoq, isumaqarlunilu aaqqissuussaanermik iluarsaaqqinneq tamavimmi ullormi ataatsimi pinavianngitsoq.
