Kommuninngornermi 8 millionit asuliinnartut

Kommunip nutaap aaqqissuussaanera suliassanut naleqqussarneqarmat, sulisut 2100-t akornanni pisortat sisamat inissaqartinneqanngillat.

- Ikaarsariarnermut ataatsimiititaliaqarnerata nalaani inuit piginnaasaqarluartut sapinngisamik atorluarniarsaralutigik inississuinikuuvugut, Kommuneqarfik Sermersuungortussami ikaarsaarnermut ataatsimiititaliami pisortaasimasoq, William Kriegel, oqarpoq.

Tassa kommunitoqqani tallimani tjenestemandit tamangajammik suliassaqartinneqarput. Pisortalli sisamat naleqquttumik akissussaaffiusumik assingusumillu akissarsiaqarfiusumik suliassaqartinneqanngimmata, appasinnerusumik, taamaalillunilu akissarsiakinneruffiusumik suliassinneqarput.

Tjenstemandilli kattuffiat pisortallu isumaqatigiissuteqarput, atorfilik appasinnerusumik suliassinneqaruni naaggaarsinnaalluni, soraarnissarlu piumasaralugu.

- Taava ukiut pingasut soraarsitaavinnissami tungaanut akissarsiami pigiinnarnissaanut periarfissaqarpoq, William Kriegel oqarpoq.

Tassalu innuttaasut 8 millionit koruuniutaat asuliinnarput.

- Isumaqatigiissutit atuuttut malinniaraanni tamanna pissusissamisoorpoq. Taakkualumi isumaqatigiissutaammata unioqqutikkuminaatsorujussuupput, William Kriegel oqarpoq.

Kommunit aaqqissuuteqqinneqarnerannut atatillugu pisortanik soraarsitsiortortoqarsimanngitsoq, Qaasuitsup Kommunia aamma Qeqqata Kommunia KNR-mut ilisimatitsipput. KNR-p paasissutissanik Kommune Kujallermut pissarsiarnineranut maannamut akissutisisimanngilaq.