Kommuninik iluarseeqqinnissaq qaaqaa!
Nunami namminermi pissutsinut Naalakkersuisoqarfimmi naalakkersuisunngussaq Anthon Frederiksen, Kattusseqatigiit Partiiat.
Taassuma suliassaasa pingaarnerit ilagaat Namminersornerullutik Oqartussani akisussaaffiit kommuuninut nuussorneqarnissaat.
Akisussaaffiit ilaat Kommuuninut nuussorneqarlutik ukioq manna aallartereersimassussaagaluarput, taamaattumik Anthon Frederiksenip naalakkersuisunngoruni suliassaqartorujussuunissani naatsorsuutigaa.
- Tassani tunngavinnut ilaapput suliassat ilaatigut kinguaattooqqasut, aammali suliassat utaqqisut arlalissuupput maannakkut. Soorlu kommunit qiviarutsigik takuinnarsinnaavarput pilersaarutit naapertorlugit ukioq manna januaarip ulluisa aallaqqaataanni kommunit akisussaaffimmik tigusereersimasussaagaluarput, tamannali suli pinngilaq, suliassat allat pilersaarutaareeraluartut ukiup tulliani tiguneqartussatut kinguartinneqartut ilaatigut aamma paasivara, taamaattumik suliassat kinguartiterneqaannassanngippata pisariaqarpoq taakkua immikkut naalakkersuisoqalernissaat, Anthon Frederiksen oqarpoq.
Anthon Frederiksen, Kattusseqatigiit Partiiat sinnerlugu inatsisartunut qinigaasoq, Nunami Namminermi pissutsinut, avatangiisinut pinngortitarlu pillugu naalakkersuisunngorpat sinniisussaa siulleq, Mogens Kleist, Inatsisartuni ilaasortanngussaaq.
