Kommunini tamani kulturip illorsuaqalerli
- Assersuutigalugu Illoqqortoormiuni isiginnaartitsiartortartut qanoq amerlatigisut Qaanaamut allamulluunniit apuussinnaasarpat, aaqqissuussinerit massakkutut itsillugit? Juaaka Lyberth aperaaq.
Qaqortormiut Nanortalimmiullu aamma nipilersortartunik avannaaneersunik tusagaqarusuttaraluartut killormulluunniit ullumikkut periarfissaqarpiarneq ajornerarpai.
- Kulturcenterit angalatitsinissanik aaqqissuussisalerpata, pitsaanerusumik eqaannerusumillu ineriartortitsisoqassaaq. Allaffissorneq aningaasannanniarnerillu saniatigut angalanissanik pilersaarusiornerit kuturcenterit isumagissavaat. Eqqumiitsuliortut, nipilersortartut isiginnaartitsisartullu kikkut sumut angalanissaat allat isumagigaat, Juaaka Lyberth oqarpoq.
Nuummi Sisimiuni Ilulissanilu kulturip illooreersut ineriartorteqqissinnaasorai, nutaamillu Qaqortumi sanasoqarsinnaasoq oqaatigalugu. Aammali kulturimut tunngatillugu sumiiffinni tamani pilersuisinnaasut ataatsimut katersortariaqarsorai.
- Nunap immikkoortuini sisamani ataqatigiissaarisuleraanni, illoqarfiit minnerit nunaqarfiillu kulturimut tunngasunik tusarnaagassanik isiginnaagassanik takusassanillu pilersorneqarnerat aqqutissiuulluarneqarnerusinnaassaluarmat. Aaqqissuusseqqinneq atuisartunut tuniniaasunullu oqinnerulissaaq, Juaaka Lyberth oqarpoq.
Taamaammat Juaaka Lyberth isumaqarpoq, kulturimut politikki nutaarluinnaq, Nunatta Karsiata aningaasaleeqataaffigisassaa pilersinneqartariaqartoq.
Sooq kommunini kulturimik suliaqarnermut Namminersorlutik Oqartussat akuliuttariaqarpat?
- Kivitseqatigiinneq Danmarkimi nunanilu avannarlerni atorneqarpoq. Kommunit naalagaaffillu peqatigiillutik kulturhusinik ingerlatseqatigiipput aningaasalersuillutillu. Tamakku isumassarsiorfissarpassuupput, Juakaa Lyberth oqarpoq.
- Kultupolitikki tassaannaanngilaq anersaakkut piorsarsisammassutsikkullu ineriartortitsineq, tassaavoq inuussutissarsiornermik ineriartortitsineq, Juaaka Lyberth oqarpoq.
Ukiut tallimat tulliuttut ingerlaneranni kommunerujussuarni tamani kulturcenterit sisamat pilersinneqarsimanissaat, Juaaka Lyberthip takorloorpaa.
Nunatta nutaamik kulturimut politikkeqalernissaa kultureqarnermut Naalakkersuisup Mimi Karlsenip maanna suliarileruttorpaa, imarisaali maannakkuugallartoq oqaatigisinnaannginnerarlugu.
