Kommunini pissutsinik isornartoqartillugu oqaatilliisoqarsinnaalissaaq

Borgmesterit tallimat kommuniminni isornartoqartillugu oqaatilliisoqarsinnaaneranut periarfisseerusupput.

Taama periarfissaliinikkut kommunini sulisut inatsisinik unioqqutitsisoqarsimatillugu, nipangiussisussaatitaanertik innarlinngikkaluarlugu, suliffigisaminni pissutsinik isorisaminnik oqaatilliisinnaalissapput.

Tamanna borgmesterit ataatsimeeqatigiinneranni eqqartorneqarsimavoq, borgmesterillu isumassarsiatsialaasutut nalilersimavaat.

Avannaata Kommuniani borgmesterip, Palle Jerimiassenip, tamanna kommunimi politikerit ilaata, Inuit Ataqatigiinnersup, Bendt B. Kristiansenip, oqaatilliisinnaanermut periarfissanik borgmesterimut ujartuereersorlu, oqaluttuaraa.

AAMMA ATUARUK Pinerluttunik Isumaginnittoqarfik oqaatilliinissamut aaqqissuussinermik eqqussisoq

- Borgmesterit isumaqatigiinnikuuvugut whistleblowerordningimut nuna tamakkerlugu assigiimmik maleruagassaqarnissaq qulakkeerniarlugu suliaq kommunit suleqatigiissutigissagaat, Palle Jerimiassen taama oqaluttuarpoq.

Bendt B. Kristianseninnimmi apeqqutigisimavaa Avannaata Kommuniani kommunalbestyrelsip sulisut pissutsinik isorisaqartillugit oqaatilliisarnissaannut periarfissamik eqqartuisoqarsinnaannginnersoq.

Taannami naapertorlugu kommunimi sisamanik illoqarfeqartumi, illoqarfimmini innuttamigut 4600-nit 650-inut assigiinngissuteqartuni, qinikkatut assigiinngitsorpassuarnik anngussivigineqarfiusartoq.

- Kisiannili aamma ilaqaratarsinnaapput eqqortortalinnik. Immaqa atorfilik imaluunniit qinigaq pisussaaffimminik uniuilluni sulisoq, Bendt B. Kristiansen oqarpoq.

AAMMA ATUARUK Suliffeqarfimmi pissutsinik isornartoqartillugu oqaatilliisoq

Taamaammaat taanna kommunalbestyrelsimi ilaasortatut isumaqarpoq kommuni pissutsinik isornartoqartillugu sulisut nalunaaruteqarfigisinnaasaannik pilersitsisariaqartoq.

- Kissaatigisara tassa uaniippoq aamma kommunimi malittarisassaqalissasugut taama siunertaqartumik. Taavalu aamma kikkut tamarmik toqqissisimallutik aamma isorinnissinnaanermik, illersorneqarsinnaanermillu tunngaveqarlutik, aqqutissaqalissasut.

Palle Jerimiassenip ilisimatitsissutigivaa suliaq maanna kommunini pisortaanerit misissuiffigigaat, taamaammat taassuma oqaatigisinnaanngikkallarpaa kommunini sulisut pissutsinik isorisaqartillutik oqaatilliisarnissaannut periarfissaq qaqagu atuutilertinniarneqarnersoq.