Kommunini ilaqutariinnermut politikkeqarneq assigiittariaqarput

Aappariit meerartallit avittartut amerliartuinnarnerat, avittoqarsimatillugulu inissaaleqilersoqartillugu kommunit assigiinngippallaamik sullisseriaaseqarnerat iliuuseqarfigeqqullugu, Siumut sinnerlugu inatsisartuni ilaasortaq Isak Davidsen Naalakkersuisumut piumasaqarpoq.

- Taamatut avinnikkut imaluunniit aapparisamik annaasaqarnikkut, kommunemiit kommuneamut atugassarititaasut ajuusaarnaraluartumik assigiinngippallaarput. Kisianni inatsiartut peqqussusiaatut aappariit taamatut avittartut inatsisitugut illersugaapput, pinngitsooratillu ikiorneqartussaallutik. Siumut sinnerlugu inatsisartuni ilaasortaq Isak Davidsen oqarpoq.

Ukiut marluk ingerlanerinnaani angajoqqaat kisimiillutik perorsaasut, 100-ngajannik amerleriarsimapput. Nunatsinni innuttaasut 38 procentii meerartaqarput, taakkunanngalu angajoqqaatut kisimiittutut nalunaarsimasut 1523-iullutik.

Ilaqutariinnermut naalakkersuisoq Tommy Marø, neriorsuivoq, ilaqutariinnermut politikkeqarneq kommunini tamani assigiiaarnerulernissaa anguniarlugu iliuuseqartoqassasoq.

- Malunnarpoq kommunini ataasiakkaani ilaqutariinnermut politikki assigiinngiiaartoq, taamaammat ilaqutariinnermut naalakkersuisutut uannut soqutiginarpoq nunatsinni ilaqutariit sullinneqarnerisa assigiiaarnissaat, kommunillu assigiingitsut ilaqutariinnut politikkiisa assigiissaarnissaat, Tommy Marø oqarpoq nangillunilu; - Taamaammat KANUKOKA suleqatigalugu kommunit qanoq ittumik ilaqutariinnut politikkeqarnerat paasiniarneqassaaq.