- Borgmesterip tusagassiutinut nalunaarummini oqaasii ilisarisinnaanngilakka, aamma isumaqarpunga kommunip sulisumi sulisorisakumilu pisinnaatitaaffii eqqumaffiginngikkai, Lars Møller-Sørensen KNR-imut allappoq. Assi: KNR

Kommunimi pisortaanerusimasup borgmesterip oqarnera eqqunnginnerarpaa

Kommunimi pisortaanerusimasup aamma sanarfinermut avatangiisinullu pisortaasimasup borgmesterimut ineqarnermut tunngasumi kukkusumik paasissutissiisimanerarneqarnertik eqqunnginnerarpaat.

Kommuneqarfik Sermersuumi pisortanerusimasoq, Lars Møller-Sørensen aamma sanarfinermut avatangiisinullu pisortaasimasoq, Hans Henrik Winther Johannsen borgmesterimit Charlotte Ludvigsenimit (IA) tallimanngornermi isornartorsiorneqangaatsiarput.

Borgmesterip kommunimi pisortatut atuuffeqarsimasut imminut kukkusumik paasissutissiisarsimasorai, allakkanillu politikkikkut akuersiffiunngitsunik atsiortitsisarsimanerarlugit.

Lars Møller Sørensenilli borgmesterip oqarnera eqqunnginnerarpaa. 

- Borgmesterip tusagassiutinut nalunaarummini oqaasii ilisarisinnaanngilakka, aamma isumaqarpunga kommunip sulisumi sulisorisakumilu pisinnaatitaaffii eqqumaffiginngikkai, Lars Møller-Sørensen KNR-imut allappoq. 

Sanarfinermut avatangiisinullu pisortaasimasoq, Hans Henrik Winther Johannsen taassuma oqarneratut aamma oqarpoq.

- Tupaallappunga, aliattallunga pakatsillungalu. Borgmesterip oqaluttuarisai ilisarisinnaanngilakka. Kukkusumillu iliuuseqarsimananga, Hans Henrik Winther Johannsen taama oqarpoq.

Borgmesterip 20 millioninik atortitsinissaq atsioraa

Borgmesterip, Charlotte Ludvigsenip kommunimi pisortaasimasut marluk imminut kukkusumik paasissutissiisarnerarlugit sulianilu arlalinni namminissarsiornerarlugit ullumi isornartorsiorpai.

Borgmesterip suliaq aalajangersimasoq kommunimi allattoqarfiup sapaatip akunnerata siuliani maluginiarsimasaa eqqaavaa.

Allattoqarfiummi Aningaasaqarnermut ataatsimiititaliap suliarisimanngisaanik Charlotte Ludvigsenip allakkami atsiorsimanera paasivaa. Ataatsimiititaliallu suliareqqaarsimasussaagaluarpaa.

AAMMA ATUARUK Borgmester om politianmeldte kommunedirektører: Min tillid blev brudt

Allagaat kommunip inissiaatileqatigiiffiutaanut Iserimmut 20 millionit koruuninik taarsigassarsinissaanut neriorsuutaavoq. Aningaasat illunik 2025-mi pisinissamut atugassaapput. Taarsigassarsinisamilli neriorsuut Charlotte Ludvigsenimit atsiorneqartinnagu kommunalbestyrelsip akuerisimanngilaa.

Charlotte Ludvigsenip oqarnera naapertorlugu kommunip pisortaanerisimasaata, Lars Møller-Sørensenip taarsigassarsinissamut allagaammik atsioqqusimavaani.

- Suliaq pillugu aperaara - paasissutissallu tunniussai naapertorlugit atsiornissara ajornartortaqarpasinngilaq, Charlotte Ludvigsen tallimanngornermi siusinnerusukkut oqarpoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl