Kommunimi atorfillit nalorninartorsiorput
Kujataani kommunit kattunnissaat eqqarsaatigalugu sulisut atorfimminniiginnarnissaat sapinngisamik ilaatigut angunairneqarpoq. Nanortallip Kommuneani sulisoqarnermut pisortaq, Henrik Lyberth, taama oqarpoq:
-Tassa massakkut imatut inisseqqavugut paasisaqaraangatta politikkimik aqutsisunit, sumut killinnersut, ataatsimiinnerat kingulleq qanoq inerneqarnersoq, taava sulisut paasissutissanik nutaanik tuniorartarpavut toqqissisimatikkusullugit.
Henrik Lyberth aperaarput, kommunit kattussuunnissaat eqqarsaatigalugu sulisoqarnermut pisortatut suna pingaaruteqarnersoq, akivorlu:
-Tassani pingaartutut taasariaqarpoq killiffik sumiinnersoq, ataatsimiinnerit kingulliit qanoq inerneqarnersut, qinersinerullu kingorna alloriaqqinnerit qanoq issanersut sulisut nalunngittariaqaraat.
Sulisunik kommuninut allanut nuuttoqarnissaa ilimanarnerluni?
-Taanna immaqa ima akisariaqarpoq: -Immikkoortortaqarfiit tamarmik inissippata, amerlanerpaat illoqarfimminniiginnarnissaat naatsorsuutigaarput, avaqqunneqarsinnaagunanngilarli ataasiakkaat illoqarfimmut allamut nuunnissaat.
Sulisummita qanoq misigisimappat?
-Uattulli pissangagunarput, qinersereernerup kingorna kikkut isernersut, kommunerujussuullu ilusissaa qanoq isikkoqarnersoq tamatta pissanngatigigunarparput, Nanortallip kommuneani sulisoqarnermut pisortaq, Henrik Lyberth oqarpoq.
Kommunili sapinngisamik sukumiisumik paasissutissiisaraluartoq, qanoq pisoqarnera ilaanni malinnaavigiuminaassinnaasoq, Nanortallip Kommuneani naatsorsuuserivimmi fuldmægtigi, Dorthe Marie Lynge, isumaqarpoq:
-Isumaga malillugu suli erseqqarinnerusumik itinerusumillu paasitinneqarneqajorpugut, Dorthe Marie Lynge oqarpoq. Allamullu nuunnissaminik neqeroorfigineqassagaluaruni tamanna piareersimaffiginnginnerarpaa, aningaasarsiaqarnerli apeqqutaalluinnarsoraa, aningaasarsiat pitsaanerussappata nuunnissani ajorinaviarnagu Dorthe Marie Lynge naggasiivoq.
