Kommunimi ataatsimiittarfimmi Inatsisartut ataatsiminnertik nangissavaat
Inatsisartut Siulittaasoqarfiata ullumi aalajangerpaa upernaakkut ataatsimiinneq naammassiniarlugu Kommuneqarfik Sermersuumi kommunalbestyrelsip ataatsimiittarfiani ataatsimiittoqassasoq.
Taamatut aalajangerneq pivoq Inatsisartut allaffeqarfiisa ilaata ulorianartumik oqoqalersimaneranik pasitsaassinerit tunngavigalugit matoqqatinneqarnissaanik Sullivinnik Nakkutilliisoqarfik peqqussuteqareertorlu. Taamaattumik siulittaasoqarfiup nuannaarutigeqaa kommune nalunaaruteqarmat Inatsisartut kommunalbestyrelsip ataatsimiittarfia atorsinnaagaat upernaakkut ataatsimiinnermi ullut ataatsimiiffiusussat kingulliit ingerlanneqarnerinut, Inatsisartut siulittaasuat taama ilisimatitsivoq.
Upernaakkut ataatsimiinnermi ullut ataatsimiiffiusussat sinneruttut sisamaagaluartut marluinnanngortinneqarput. Taamaalillutik Inatsisartuni ullut ataatsimiiffiusut 15-iat tallimanngornermi ulloq 8. april ingerlanneqassaaq ullullu ataatsimiiffiusut 16-iat kingullersaallu pingasunngornermi ulloq 13. april ingerlanneqassalluni. Ulluni taakkunani tamani ataatsimiinnerit nal. 10.00 aallartittassapput.
Taamaalilluni aamma immikkoortut ataatsimiinnermi matumani oqaluuserineqartussaagaluartut arfiniliinnaat 2011-mi ukiakkut ataatsimiinnissamut (UKA11) kinguartinneqassapput, tassalu Nunatta Karsiata 2010-mut naatsorsuutaasa siullermeerneqarnerat, apeqquteqaat aallaavigalugu oqallinnissamut siunnersuut ataaseq, taamatullu aamma aalajangiiffigisassatut siunnersuutit sisamat 2011-mi upernaakkut ataatsimiinnermi (UPA11) siullermeerneqareersut kisiannili ataatsimiititaliani naammassillugit suliarineqaqqaartussat Inatsisartuni aappassaaneerneqannginnerminni.
