Kommuni sumiginnaasimasutut eqqartuunneqarpoq

Nunatsinni kommunip meeqqamik sumiginnaasimanera pillugu eqqartuussineq siullerpaaq ullumi Nunatta Eqqartuussiviani ingerlanneqarpoq. Perorsaasut Ilinniarsimasut Peqatigiiffiata, PIP-p, niviarsiaqqamut ajornartorsiutilimmut anaanaq sinnerlugu Nanortallip Kommunia eqqartuussisunut tunniussimavaa.

Videukkut ungasissumut attaveqaat atorlugu ilisimannittut Nanortalimmiittoq, Qaqortumiittoq kiisalu Danmarkimi Fynimiittoq killisiorneqarput. Ilisimannittut tamarmik PIP-p eqqartuussissuserisuanit Henrik Karl Nielsenimit killisiorneqarput tamannalu iluarisimaarneqarpoq:

- Assigiinngitsorpassuarnik saqqummersoqarpoq. Isumaqarpunga uani pineqartoq tassaasoq anaanaq kommunimut ikioqqulluni saaffiginnissimasoq – kommunip akueraa ajornartorsiuteqarmat, kisiannili ikiorserneqanngilaq, Henrik Karl Nielsen oqarpoq.

Aammattaarli Nanortallip kommuniata eqqartuussissuserisua iluarisimaarinnippoq.

- Isumaqarpunga ullumikkut uppernarsarneqartoq Nanortallip Kommunia eqqortuusorisaminik iliuuseqarsimasoq, Niels Hansen Damm oqarpoq.

Eqqartuussinermi pineqartoq niviarsiaraq inunnik isumaginninnermut siunnersortip allattugai naapertorlugit imminut toqunniarsarisimavoq atuarninilu nakkutigisimanagu.

PIP-p eqqartuussissuserisuata tunngavilersorluni uppernarsarniarsaraa Nanortallip Kommuniata meeqqanut inuusuttunullu ikiuinissamut Inatsisartut Peqqussutaat minnerunngitsumillu Naalagaaffiit Peqatigiit meeqqat pillugit aalajangersagaat unioqqutinneqarsimagai.

Kisianni Nanortallip Kommuniata eqqartuussissuserisuata eqqartuussivitsigut suliassaqannginnerarpaa. Ullumikkut nalunaaquttap akunnera ataaseq sinnerlugu eqqartuussivik paasitinniarsaraa nunatsinni kommunit Naalagaaffiit Peqatigiit meeqqat pillugit aalajangersagaat malittussaanngikkaat.

- Suliassanut assigiinngitsunut tunngatillugu patsisiginiarneqartuartarpoq, ullutsinnimi aalajangersakkanik innersuussisarneq nuannaartorineqalersimavoq, Niels Hansen Damm oqarpoq. Aamma ilanngullugu oqaatigaa suliassaq ingasaanneqarsimasoq PIP-millu tusagassiorfinnut tusaqqusaarutitut atorneqartoq – tamannali PIP-p siulittaasuanit Kaaliina Skifte-mit ilumuunnginnerarneqarpoq.

Peqatigitillugu PIP-mit oqaatigineqarpoq kommunit meeqqanik sumiginnaasimanerannik tunngasunik arlalinnik suliassaqaraluartoq.

Kingusinnerpaamik juuli aallartilaarpat eqqartuussinermi aalajangiisoqassaaq.