Kommuni suliffissaaleqisut ikiuutissaannik amerlanerusunik pisariaqartitsisoq
Ilaqutaarinnermut ataatsimiititaliaq pisortanit ikiorsiissutinik immikkut 3,5 million koruuninik ukiup sinneranut atugassaqarumalluni Qeqqata Kommuniata kommunalbestyrelsia Maniitsumi ullumi ileqquusumik ataatsimiimmat qinnuteqarpoq.
Pisortanit ikiorsiissutit missingersuutaasunit 3,5 million koruuninik amerlanernik ukiup sinneranut atuinerusussanngortoqarmat immikkut qinnutigineqarlutik. Kommunip ukioq maannamut missingersuutai 6,4 million koruuniupput, 9,9 million koruunilli pisariaqartinneqartussaalerlutik.
Pisortat ikiorsissutaannik pisariaqartitsinerulerneq Sisimiuni suliffissaaleqinerujussuarmik pissuteqarpoq. Sisimiuni ukioq manna ukiup affaata siulliani suliffissaaleqisut 318-upput. Ilanngullugu oqaatigineqarsinnaavoq Sisimiuni siorna suliffissaaleqisut 258-ummata, 2010-mi 124-it 2009-milu 93-it.