Nikanarsaalluni tiingaffiginninnermut tunngasuni immikkut politikkiliortoq sivisujunnanngitsoq, Kommuneqarfik Sermersuumi sulisoqarnermut sulisunullu pisortaq John Thorsen oqarpoq.Assi: KNR / Malik Brøns

Kommuni: Nikanarsaalluni tiingaffiginninnermut tunngasuni politikkiliorpugut

Piffissami kingullermi oqallisigineqaqisumut, nikanarsaalluni tiingaffiginninnermut tunngasuni, Kommuneqarfik Sermersooq politikkiliorpoq.

Sulisoq qanoq iliussava, aqutsisullu nikanarsaalluni tiingaffiginninnermut tunngasut suut suliassarai? Kommuneqarfik Sermersuup 2.000-nit amerlanerusunik sulisullip nutaanik politikkiliornermini apeqqutit tamakku ersarissumik nassuiassavai.

Kommuni nikanarsaalluni tiingaffiginninnermut tunngasuni immikkut politikkiliortoq, sulisoqarnermut sulisunullu pisortaq John Thorsen oqarpoq.

Sullivimmi nikanarsagaalluni tiingaffigineqarneq suua?

 

  • Tassaavoq inummit allamit allanilluunniit qaninngoorfigineqarneq suiaassutsimilluunniit tunngaveqartumik malersorneqarneq, ingammik sullivimmi.

 

  • Nammineq kissaatiginngisamik attuualaarneqarnerusinnaavoq, oqaatsitigut pissusilersuutitigulluunniit tiinganiakujuffigineqarnerusinnaavoq, siuttup atorfimmik atornerluinerisinnaavaa imaluunniit toqqaannartumik pinngitsaaliilluni tiinganiakujunnerusinnaavoq.


Tusarfik: Den Store Danske.

- Matuma sapaatit akunnerata siuliani oqallisaanerata nalaanni qaqinnikuuarput aalajangiullugulu, isumassarsiorfissatsinnik ujarleriarluta nikanarsaalluni tiingaffiginninnermut tunngasuni politikkimik qanoq ittunik pilersitsisinnaanerput ataatsimiitsitaliaaqqamut pilersitassatsinnut sapaatip akunnerata uuma naalernerani suliakkiissutigissavarput, John Thorsen oqarpoq.

Politikkiliornissaq sivisunavianngitsoq

Kommuni annersaanermut, sioorasaarinermut, qinngasaarinermut nikanarsaanermut - nikanarsaalluni tiingaffiginninnermut tunngasuni tassunga ilaalluni - ataatsimut maanna politikkeqarpoq. Nikanarsaallunili tiingaffiginninniarnermut tunngasuni maanna politikkiliorpoq.

- Sivisoorujussuusariaqanngitsoq naatsorsuutigaara, taanna suliffeqarfinni allani takusinnaavarput naammassineqareernikuusoq. Uagullu taakkunanngarniit suut atorsinnaanerigut, uagutsinnut tulluarnersut misissussavarput. Taamaammat nutaamik nassaarsiortariaqanngilagut, John Thorsen oqarpoq.

AAMMA ATUARUK Kommune Kujalleq: Nikanarsaalluni tiingaffiginninneq akuersaanngilarput

Avannaata Kommuniani nikanarsaalluni tiingaffiginninneq pillugu persuttaanermut, qinngasaarinermut nikanarsaanermullu tunngasuni politikki aallaavigalugu sulisoqartarpoq, taamaaginnassallunilu. Kommunilli isumaa ersarittoq, borgmesterip Palle Jeremiassenip erseqqissarpaa:

- Nikanarsaalluni tiingaffiginninnermut tunngasumik ersarittumik malitassaqarpugut, tassalu kommunitsinni akuersaarneqanngitsoq, Palle Jeremiassen oqarpoq.

Oqaatilliisinnaanermut periarfissaqarneq

Kommunini tallimaasuni pissutsinik isornartoqartillugu sulisuminnit oqaatilliisoqarsinnaaneranut periarfissiisalerusuttut, kommunit februarimi ilisimatitsipput.

Taama periarfissaliinikkut kommunini sulisut inatsisinik unioqqutitsisoqarsimatillugu, nipangiussisussaatitaanertik innarlinngikkaluarlugu, suliffigisaminni pissutsinik isorisaminnik oqaatilliisinnaalissapput.

AAMMA ATUARUK Kommunini pissutsinik isornartoqartillugu oqaatilliisoqarsinnaalissaaq

Aaqqissuussaq Kommune Kujallermi Kommuneqarfik Sermersuumilu atuutilereerpoq. Avannaata Kommuniani sapaatit akunnerata ingerlanerani atuutilertussasoraat.

KNR Qeqqata Kommunianit Kommune Qeqertalimmiillu apersuiniaraluarpoq, Qeqqata Kommunianiilli apersorneqarnissamut marlunngormat periarfissaqarnatik oqarput, Kommune Qeqertalillu saaffiginnissutitsinnut akinngilaq.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat