Kommuni Kujallermi akileraarut 44 procentiussaaq

Kommune Kujallermi akileraarutip 45 procentiunissaa ikaarsaariarnermut ataatsimiitialiap sapaatip akunnera kingulleq nalunaarutigereeraalu, akileraarutip procentimik ataatsimik appartinnissaa aalajangiunneqarpoq, taamaasilluni akileraarut 44 procentiussalluni.

Nanortalimmi innuttaasut procentinik marlunnik akileraarnerulertussaangaluit taamaasillutik procentimik ataasiinnarmik akileraarnerusalissapput.

Illuatungaani Narsarmiut Qaqortormiullu akileraarutaat procentimik ataatsimik appassasoq, Ikaarsaariarnermut Ataatsimiititaliami siulittaasoq Simon Simonsen oqarpoq.

Kommunip karsiata uninngasuuteqassasoq Kommuninik nakkutilliisoqarfiup piumasaqaatigivaa, tamannalu aamma 1,5 millioni koruuninik sinnertooruteqarnikkut malinneqartussanngortoq Simon Simonsen ilisimatitsivoq.

Aamma aningaasatigut sillimmatissanik 4,7 millioni koruuninik illuartitsinissaq ikaarsaariarnermut ataatsimiititaliamit aalajangiunneqartoq Simon Simonsenip oqaatigaa.

Kommune Kujalermi innuttaasut sullinneqarnerata pitsanngoriarnissaa pingaarnertut tunngavigalugu taama aalajangiisimallutik Simon Simonsenip oqaatigaa.

Assersuutigalugu taarusuppai, Narsami inuusuttut ornittagartaarnissaannut aningaasaliineq, Nanortalimmi utoqqaat illuanni sulisut amerlinissaat, utoqqaallu tapisiarisinnaasaannik amerlisaanissaq kiisalu utoqqaat najugaasa amerlinissaannut pilersaarusiorlunilu aningaasaliinissaq.

Simon Simonsenip oqaatigaa akileraarut aappaagu qaffattariaqalersinnaasoq, apeqqutaassaarligooq sanaartugassat qanoq ingerlanersut.