Kommuni facebookimi oqallinnissamut aggersaavoq

Qaasuitsup Kommuniata siumut pilersaarutaa innuttaasunit facebookikkut oqalliseqataaffigineqarsinnaanngorpoq.
oktobarip 27-at 2010 06:45

Qaasuitsup Kommunia sapaatip akunnerini tulliuttuni arfinilinni misiligutitut innuttaasunik facebookikkut ataatsimiititsiniarpoq.

Oqallinnermi qulequtarineqarpoq ”Pilersaarut 2010”-mut siunnersuut, sapaatip akunnerini makkunani tusarniaassutigineqartoq.

Taamatut misiliineq innuttaasunik ataatsimiititsinernut nalinginnaasunut tapertaassasoq kommunimit oqariartuutigineqarpoq.

- Facebookikkut misilittagaqalerusuppugut, qularutigisassaagunanngimmammi internetti siunissami naapeqatigiiffittut pingaaruteqaleriartussaasoq, aamma uagut kommunerujussuatsinni, sulisunut pisortaq Sofia Geisler oqarpoq.

Facebookkimi allanneqartut tamarmik pappiliamut nuunneqassapput pilersaarusiallu tusarniaassutigineqarnerani ilanngussanut ilaatinneqassallutik.

Facebook atorlugu innuttaasunik oqallitsitsineq nunarsuarmi kommunit annersaata iluani demokratiskiusumik oqallinnerup pilersinnissaanut iluqutaassasoq, kommunimit aamma oqariartuutigineqarpoq.