Kommunerujussuanngortussat suleriaqqinnissaminnut akunnattoorput
Ikaarsaariarnermi ataatsimiititaliaq, maaji 2008-mi pilersinneqartussaq utaqqinagu oqartussaafiit suut Namminersornerullutik Oqartussanit kommuninut nuunneqassanersut paasinissaat kujataani kommunit peqatigiiffianit piumasarineqarpoq.
Tassa suliassaq taama pingaaruteqartigisoq, ikaarsaariarnermi ataatsimiititaliap pilersinneqarnissaanut isumaqarpugut utaqqissunneqarsinnaanngitsoq. Maannakkut suliassat pinngitsuuinnata pisariaqarparput, taamaaliornikkut pilersaarusiornerit aallartinneqarpata siunertaqartumillu aamma ingerlatsineq ingerlalerpat sulisut piukkunnarsarneqarnissaat suliarisussaavarput, taamaammat nukinginnarsivoq, aamma taassuma ersarissumik paasinissaa. Tamatuma saniatigut aningaasanik malitseqarnissaa aamma qulakkeerneqartariaqarpoq, kiisalu assigiinngitsitigut soorlu aningaasatigut akiligassanik kinguartooruteqarnikut suliassat nuunneqassappata kissaatiginngilarput taakkua kommunit nammassinnaanngisaanik tunniussinerit ingerlanneqassasut. Minnerpamik taakkua pinaveersaartinneqartariaqarput, aammalu pinngitsuuinnani Namminersornerullutik Oqartussat ataaniittut kommuninut nuunneqarpata taakkua aningaasatigut malitseqartariaqartut kommuninut aningaasartuutaanngitsumik.
Kujataani Kommunit Peqatigiiffianni siulittaasoq, Narsami borgmesteri, Kiista P. Isaksen taama oqarpoq. Taassuma ilanngullugu oqaatigaa, kommunit kattunnissaminnut piareersaasiornerat ingerlalluartoq, taamaattorli sorpiaat Namminersornerullutik Oqartussanit tunniunneqassanersut pinngitsooratik maannangaaq paasisariaqaleritsik.
KANOKOKA-mi siulittaasoq, Søren Alaufesen oqarpoq, oqartussaaffinnik sorlernik nuutsinissaq pillugu Naalakkersuisut siulittaasuannik Hans Enoksenimik juunip naalernerani ataatsimeeqateqarluni.
Oqartussaaffiit suut kommuninut nuunneqassanersut allaffissornikkut maanna suliarineqarmata aggustip naalernerani septembarilluunniit aallartilaarnerani ataatsimeeqatigeeqqissallutik Søren Alaufesen aamma oqarpoq.
