Kommunerujussuanngortussani siulittaasut piareersimapput
Inatsisartut ullumi ataatsimiilerunik oqaluuserisassaat pingasuupput. Siullertut nal. qulinut Naalakkersuisut siulittaasuata Hans Enoksenip ammaanermi oqalugiaataa oqallissutigineqassaaq. Aappaattut eqqartorneqassalluni kommunit aaqqissugaanerata nutarternera pillugu Inatsisartut inatsisissaannut siunnersuut. Tassani kommunit 18-it qanoq iluseqarlutik, qaqugulu sisamaannaanngortinneqassanersut siullermeerlugu oqaluuserineqassaaq.
Kommunit kattussuunnissaat kinguaattoorfiusinnaasoq KANUKOKA-p siulittaasua, Søren Alaufesen tallimanngormat radioavisimut oqarpoq.
Kommunit 2009-mi kommunerujussuanngortussat qanoq piareersimatiginersut Radiaviisimiit paasiniaavigaagut:
-Namminersornerullutik oqartussaniit akisussaaffinnik tigusinissatsinnut piareerpugut, Jess Svane Avannaata Kommunerujussuassaa sinnerlugu oqarpoq.
Tamannalu qeqqata kommunessaanit isumaqatigineqarpoq.
- kattunnissatsinnut piareersarluta piffissalersuilereerpugut, ataatsimiititalianillu aallartitsereerluta, taamaammat 2009-mi kattunissatsinnut angumersisinnaavugut, Søren Lyberth qeqqata kommunissaa sinnerlugu oqarpoq
Kommeqarfissamit Kangia-Kitaanit oqariartuut aamma taamaappoq:
- Sulisorujussuuvugut ataqatigiissaarilutalu taamaasillunilu 2009-mi kattunnissaq anguneqarsinnaavoq. 2011-mut kattussuunnissaq kinguartinneqassappat, sulineq kinguarsarneqaannassaaq, Ove-Karl Berthelsen kommunerujussuassaq Kangia-Kitaa sinnerlugu oqarpoq.
Kujataani kommunit kattuttussat aamma piareersinnaapput.
- 2009-p tungaanut sulineq aallartilluarparput, ilimagaarpullu angumerisinnaassallugu, kujataani kommunerujussuassat allattaat, Ole Mølgaard-Motzfeldt oqarpoq.
Kommunit aaqqissugaanerata nutarternera pillugu Inatsisartut inatsisissaannut siunnersuutip saniatigut Kommunit aqutsinermut inatsisissaattut nutaatut siunnersuummik Inatsisartut 2008-mi ukiakkut ataatsimiinnissaanni najukkani aqutsisut pillugit aalajangigassatut siuinnersuummi taaneqartutut malittarisassanik imalimmik Naalakkersuisut saqqummiussaqarnissaannik siunnersuut pingajuattut oqaluuserineqassaaq.