Tele-Postimi sulisoqarnermi pisortap Helena Rotvig Kristiansenip Kommuneqarfik Sermersuumi Facilitychef Gerth Jacobsen isumaqatigiissummik atsioqatigaa.Assi: Tele-post

Kommuneqarfik Sermersuup Tele-Postillu meeqqat pikkorissartinniaraat

Kommuneqarfik Sermersuup Tele-Posti suleqatigalugu meeqqat atuarfianni qarasaasialerinermi atuartitseriaaseq nutaaq atuutsilerniarpaat. Atuartut suliffeqarfimmut qarasaasialerisunut nutaaliaminnik ilaatigut saqqummiussissasut Tele-Post allappoq.

Meeqqat inuusuttullu digitalip silarsuaani piginnaasaat nukittorsarniarlugit Tele-Post Kommuneqarfik Sermersoorlu meeqqat atuarfianni klassit sisamat pikkorissarnissaat isumaqatigiissutigaat. Atuartitsineq ”Coding Classes”-imik atserneqarpoq, taanna qarasaasiakkut kodeliornermik piareersaatitut sammisaavoq.

Ulluni tallimani ilinniartitsisoqassaaq tassani ajornartorsiut aalajangersimasoq aallaavigalugu atuartut qarasaasiakkut aaqqiissutissaq suliaralugu naammassiniassavaat, Tele-Postimullu saqqummiullugu.

Teknikkerinngorumaartut ingeniærinngorumaartullu piareersarneqassasut

Kinguaariinni tulliuttuni teknikkerinngorumaartut ingeniørinngorumaartullu aallartisarnissaat siunertaasoq Kommune Tele-Postilu ataatsimoorlutik tusagassiuutinut allapput.

- Kalaallit Nunaanni teknologiimik digitaliusumik pisinnaasalinnik amigaateqartorujussuunera ilisimalersimavarput, taamaattumik kissaatigaarput meeqqat inuusuttullu IT-mut soqutigisaqarnerat eqeersaaqataaffiginairlutigu, IT-mik atuisinnaaneq kisiat pinnagu aamma IT sakkugalugu pilersitseqataasinnaaneq anguniarlugu, Tele-Postimi sulisoqarnermut immikkoortortaqarfimmi pisortaq Helena Rotvig Kristiansen oqarpoq.

- Kinguaariinni tulliuttuni teknikkerinngorumaartut ingeniørinngorumaartullu aallartisarnissaat qarasaasiakkut kodelersuilluni pisinnaasalersuisitsisinnaaneq atuarfimmi ilinniagassat ilaattut ivertinneratigut siunertaraarput, taanna oqarpoq.

Isumaqatigiissut pillugu Kommuneqarfik Sermersooq qilanaarpoq:

- ’Coding Class-imik’ atuartitseriaaseq, maannamut atuartitsissutaasartutoqqanit allaanerusunik piginnaasaqartitsilersussaavoq, meeqqat siunissaannut nukittorsaataalluartussanik, Kommuneqarfik Sermersuumi Meeqqanut Atuarfeqarnermullu Ingerlatsivimmi pisortaagallartoq Marie Fleischer taama oqarpoq

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat