VIDEO Kommuneqarfik Sermersuup biilii nipikillissapput
Biilit innaallagiatortut Nukissiorfiit 2010-imili atulerpaat, massakkullu Kommuneqarfik Sermersuup biilit innaallagiatortut siulliit arfinillit decembarimi Nuummi atulissavaat. Ukiut ingerlanerini biilit naliginnaasut ilai innaallagiatortunik taarsersorneqassallutik.
Viceborgmesterilu Justus Hansenip siullermeerluni innaallagiatortumik ullumi biilerneq misileqqaarpaa. Nuummi biilit innaallagiatortut atorneqartussat arfinillit taakkualu sarfalersorfissaat 3 millionit koruuneqassapput.
Biilillu innaallagiatortutut ukiut tulliuttut ingerlanerini qulit aamma 15-it missaaniittut kommunimi pisiarineqarnissaat Kommuneqarfik Sermersuumiit siunniunneqarpoq.
Biilinik taarsersuinikkut CO2-mik aniatsitsineq annikillisinneqassaaq, taamaalilluni biilit innaallagiatortut atulernerisigut avatangiisinut mingutsitsineq annikinnerulersinniarneqassalluni.
Justus Hansenip biilit innaallagiatortut misilippai
Kommuneqarfik Sermersooq biileqarpoq 100-t missaaniittunik, taakkulu ilai innaallagiatortunik taarserneqartussanngorput.
Justus Hansenillu biilit misilitani ima nassuiarpaa:
- Soorlu biilit allat, kisianni una nipeqannginnera allaaneruvoq.
Tassa biilit innaallagiatortuugaluarlutik biilit allat assigiinnarpai, nipikinnerunerali taassa kisimi allaalluni.
IA Demokraatillu kommunalbestyrelsemi suleqatigiikkallarmata kommunip biilii siunissami innaallagiatortunik taarsersornissaat isumaqatigiissutigisimavaat.
Akilersinnaanissaat aamma eqqarsaatigineqarsimavoq:
- Taanna oqallisiginikuuarput sivisulaqartumik kommunalbestyrelsip iluani. Kisianni ukiut arfineq marluk ingerlaneranni taanna akilernera tigoqqittussaavarput, Justus Hansen KNR-imut nassuiaavoq.
