Kommuneqarfik Sermersuup atuutilernera malunnartinniarpaat
Ullumikkumiit nunatsinni kommunit kattussuunnerat piviusunngoraluttualerpoq. Nuummi kommunit kattussuunnerat, tassa Kommuneqarfik Sermersuunngornermut atatillugu borgmesterip oqalugiarneratigut, ikumatitalerluni ingerlaaqatigiinnikkut qummoroortartornikkullu malunnartitsiniartoqassaaq.
Allattoq Jaaku Lyberth
januaarip 01-at 2009 16:54
Tallimanngornermi januaarip aappaani illoqarfiup matuersaatai borgmesterimit tunuartumit Nikolaj Heinrichimit borgmesterinngortumut Asii Chemnitz Narup-imut tunniunneqassapput. Tunniussinerup kinguninnguagut borgmesterinngortoq nal. Qulingiluat qeqqanut Nuummi Illorsuaq Timersortarfimmi najuuttunut oqalugiassaaq.
Ulloqeqqarpat Nuummi Illorsuup Timersortarfiup silataaniit ballonginik aallarartitsisoqassaaq.
Arfinginngorpat Katuamit arsaattarfimmut ikumatitalisaarluni ingerlaaqatigiittoqassaaq, Inussiviup eqqaani qummoroortartornermik naggaserneqartussamik. Qummoroortartortoqareerpat Inussivimmi nipilersortulerluni kakaavisorlunilu kaagisortoqassaaq.
