inissiat 1.850-it ukiut arfinillit ingerlanerini sanaartorneqarlutik naammassineqarnissaat pingaarnerpaatut inississimavarput, borgmesteri Charlotte Ludvigsen (IA) oqarpoq.Assi: KNR

Kommuneqarfik Sermersuup aappaagumut missingiutaa isumaqatigiissutigineqartoq

Inissiat amerlanerusut, sunngiffimmi sammisassat tamatumunngalu atortut taavalu ilaqutariit inuuniarnermikkut ajornartorsiuteqartunut tapersersuinissaq Kommuneqarfik Sermersuup siunniuppaa.

Tassa Kommuneqarfik Sermersuumi 2021-mut aningaasaqarnermut missingiusiornissamut partiit isumaqatigiissutaanni naammassisassat ilaat.

Nammineq ineqarnissamut pisinnaatitaaffik isumaqatigiissummi pingaarnerpaat ilagaat. Taamaammat Kommuneqarfik Sermersuumi inissianik ikinnerpaamik 1.850-inik ukiuni arfinilinni tulliuttuni sanaartortoqassaaq.

Inuusuttut, ilaqutariit, utoqqaat angerlarsimaffeqanngitsullu ineqalernissaat siunertarineqartoq kommunimi borgmesteri oqarpoq.

 

AAMMA ATUARUK Budgettet er lagt for næste år i Kommuneqarfik Sermersooq

- Ilaqutariit namminneq angerlarsimaffeqartinnissaat pingaaruteqarpoq. Taamaattumik inissiat 1.850-it ukiut arfinillit ingerlanerini sanaartorneqarlutik naammassineqarnissaat pingaarnerpaatut inississimavarput, borgmesteri Charlotte Ludvigsen (IA) oqarpoq.

Inuit Ataqatigiit, Demokraatit Suleqatigiisitsisullu 2021-mut aningaasanut missingiusiornissamut isumaqatigiissuteqartuupput.

Borgmesterip oqarnera naapertorlugu Paamiuni Tasiilamilu ukiuni tulliuttuni qulini ukiumut inissiat 15-it sananeqartassapput.

Sullissinermut atortuusivik mountainbikertarfillu

Nuummi sunngiffimmi periarfissagissaarnerulissaaq. Timersortarfiit, sisorartartunut majuartaat nutaaq, mountainbikertartunut ingerlaarfiit aqqusineeqqallu ilaatigut pilersaarutaallutik.

Kommunimut akileraarut nikisikkumanngilaat, tamatumuunami aamma sipaarniarnissaq aqqutaassaaq. Taamaalillutik 60 millionit koruuninik sinneqartooruteqarnissaq siunniuppaat.

- Allaffissornermi naleqqussaaqqinnikkut sipaarniartoqassaaq. Taavalu aamma atorfiit inuttassaaleqiffiusimasut inuttalersorneqarnikuupput. Taamaattumik avataaniit siunnersuisunik atuinikinnerulerluta atorfiit aappaagumiit inuttalersorneqarput, Charlotte Ludvigsen oqarpoq.

Kommuneqarfik Sermersuup nunaqarfiinut pilersaarut 70-it millionit koruunit ukiuni tullerni qulingiluani aningaasaliiffigineqarpoq.00:00:22

Taavalu Tasiilami kommunip sullissinerminut atortuusivittaarluni, qatserutaasivik inuusuttullu ornittagaannik sanasoqassaaq.

Ingerlatsinermut 2 milliardit koruunit atorneqassapput 2021-imilu sanaartugassanut 300 millionit koruunit immikkoortinneqarlutik.

Siumut aningaasaqarnermut missingiusiornissamut isumaqatigiissuteqarnermi ukiup aappassaani peqataanngilaq. Aningaasaqarnermut missingiusiornermi suleriuseq naammaginagu peqataanatik partiip kommunalbestyrelsimi ilaasortaatitaata Peter Davidsenip KNR-imut oqaatigaa.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat