Kommuneqarfik Sermersuup 2011-mut naatsorsuutai tukapput
Kommuneqarfik Sermersuup naatsorsuutaasa tukannerat, kommunip siorna pisortaanerata Søren Hald Møllerip nassuerutigaa:
- Naatsorsuutit takutippaat suliassaqarfinni arlalinni sippuisoqarsimasoq. Tamanna naammaginanngilaq aammalu sippuisoqannginnissaa anguniarlugu pimoorussamik sulisoqarpoq. Peqatigitillugu oqaatigissavara, ingerlatsinerup allaffissornerullu pitsanngortinneqarnissaanut sulilluarsimanerput sunniuteqarluarsimasoq paasinarsiartormat, Søren Hald Møller oqarpoq.
Aningaasat kommunip kaaviaartitai 1,3 milliardit koruunit missaanniipput, 2011-milu 6,3 millionit koruuninik amigartooruteqarluni.
Kisianni kisitsisit tamaattut kommunalbestyrelsemut maajimi 2012-imi akuerigallagassanngorlugit takutinneqanngillat. Tassami saqqummiunneqartut 23,7 millionit koruuninik amigartooruteqarfiupput.
Kommunilli ingerlatsivianit kingorna kukkunersiuisoqarlunilu naligiissaarisoqarpoq, ataasiakkaatigullu atukkanik nalunaarsueqqittoqarmat naatsorsuutit katillugit 17,4 millionit koruuninik allannguiffigineqarput.
Naallu Kommuneqarfik Sermersuup 2011-mut naatsorsuutai ukiunut siuliinut naleqqiullugu pitsanngoriaateqaraluartut, kommunip aqutsinera naammaginartumik ingerlassappat aqutsinermik naatsorsueriaatsimillu ajornartorsiutit aaqqittariaqartut amerlasuujusut, kukkunersiuisut Deloitte, naatsorsuutinut oqaaseqaataanni aamma takuneqarsinnaavoq.
Aamma naatsorsuutit suli uniuuttumik ersersitsinerulerput, kommunip akiitsuisa qanittukkut taarsigassat 19,2 millionit koruunit inissinneqarsimanerat kukkunersiuisut apeqqusermassuk.
Aningaasat taakku sulisut sulinngiffeqarnerminni aningaasarsiassarigaat kommuni oqarpoq kukkunersiuisullu piumasaqarput tamanna kommunip uppernarsassagaa, kinguneqanngitsumilli. Tassami kommunip pappialat piumasarineqartut kukkunersiuisunut piffissaagallartillugu tunniutinngitsoorpai.
