Kommuneqarfik Sermersuumi Siumut IA-lu imminnut ungasittupilussuupput
Martha Abelsen 800-nik taaguunneqarluni qinigaalluarnermi kingorna kommunimi illoqarfiit pingaarnersaata inissisimaffigisaani borgmesterinngornissi naatasorsuutigisimagaluarpaa, taamaattoqassanngilarli. IA-mmi borgmesterissatut piukkussaa, maanna borgmesteriusoq Asii Chemnitz Narup, qinersinermi angusagissaarneruvoq. Taanna qinersinermi 1400-t missaannik taagunneqarpoq. Taamaammat aamma partiinik allanik isumaqatigiinniartussanngortitaavoq, ilisimaneqartutullu IA-p Demokraatillu suleqatigiinnissamik isumaqatigiinnerannik kinguneqarpoq Asiilu ukiuni tullerni sisamani borgmesteriuinnarnissani qulakkeerpaa.
- Kommuneqarfik Sermersuumi Siumut sinnerlugu qinigaasut isummaqatigiinniarnermut qaaqqusaanermi aap naaggalu kisiisa tunngavigalugit borgmeterinngortitsinissamut tunuliaqutsiisinnaannginnatta Isumaqatiginninniutertaqangitsumik akuerserususimanngilagut, Martha Abelsen Kommuneqarfik Sermersuumi kommunalbestyrelsimi Siumup gruppia sinnerlugu oqarpoq.
Ukiuni kingullerni isumaqatigiinniarnerit pingaarutillit ingerlanneqartussanngoraangata partiit anginerit partiinik allanik mattussisarnerat ileqquuleriartorsimavoq. Tamanna ilaatigut Inatsisartunut qinersinerup kingorna naalakkersuisunngortitsiniarluni isumaqatigiinniarnerni takuneqarpoq, tassamini IA qaaginnakkut isumaqatigiinniarfigineqarpoq kingornalu Siumut, Atassut Partii Inuillu naalakkersuisunngortitseqatigiillutik. Siumullu Kommuneqarfik Sermersuumi taamatuffaarik pineqarsimasutut maanna misigisimavoq.
-Suleqatigiissutissanillu ersarissunik tigussaasunilluunniit isumaqatiginninniutissaqanngimmata naaperiutissanik tigussaasunik inuttaasunut oqariartuutissaqanngimmata, piumasaqarfigaagut ersarissunik tigussaasunik tungavilimmillu takoqqaarusulluta naapeqqinnissamut aammalu IA-kunniit taamatut aamma piumasaqarput, kisiannili naapeqqinnermi taamaallaat piumasaqaqqipput suli aap naamiluunniit kisiisa apeqqutigalugit tamannalu uagut innuttaasut sullitassagut eqqarsaatigalugit taamak tunngavissaqanngitsigisumik isumaqatiginninniarnerit akuersaarsinnaannginnatsigit oqariartuuteqarpugut, taamatut akuersaaginnarsinnaanata, Martha Abelsen nassuiaavoq.
