Kommuneqarfik Sermersuumi pisortat marluk suliunnaartut
Kommuneqarfik Sermersuumi pisortat ataatsikkut suliunnaartut.
Kommunaldirektøri Lars Møller-Sørensen aamma Sanarfinermut Avatangiisinullu Ingerlatsivimmi pisortaq Hans Henrik Winther Johansen Kommuneqarfik Sermersuumi atorfimminnit suliunnaarput.
Lars Møller-Sørensen Kommuneqarfik Sermersuumi septembarimi 2017-miit pisortatut atorfeqarpoq.
Tamarmik isumaqatigiissuteqarnikkut ingerlanneqarput.
Taama Kommuneqarfik Sermersooq tusagassiuutinut allappoq.
- Larsip aamma Hans Henriup ukiuni kingullerni arlaqartuni kommunip ineriartorneranut annertuumik sullissisimanerat pillugu qutsavigerusuppakka, siunissamilu ajunnginnerpaanik kissaallugit, borgmesteri Charlotte Ludvigsen tusagassiuutinut nalunaarummi allappoq.
Kommunaldirektøritut atorfik piaarnerpaamik inuttassarsiuunneqassaaq, Sanarfinermut Avatangiisinullu Ingerlatsivimmi pisortamik atorfinitsitsiniarnermi kommunaldirektørinngortussaq peqataatinneqarniassammat, pisortatulli atorfik kingusinnerusukkut inuttassarsiuunneqarumaarpoq.
Stabschefi Alex Nørskov Sanarfinermut Avatangiisinullu Ingerlatsivimmi pisortaagallartinneqarpoq, vicekommunaldirektørilu Marie Fleischer kommunaldirektøriugallartinneqarluni.