- Taamaattumik Nakkutilliisoqarfiup isornartorsiuinera uanga assut ilungersunartutut tiguara, soqutaarpianngitsutut isigissallugu kissaatiginngilluinnarlugu. Ilisimalikkakka taakku ilanngullugit siunissami suleqqinnissanni eqqaamajumaarpakka, Asii Chemnitz Narup oqarpoq.Assi: Marie Kuitse Kristensen / KNR

Kommuneqarfik Sermersuumi borgmesteriusimasup ineqarnermut suliaq pillugu isornartorsiuineq ilungersunartumik tigugaa

Kommuneqarfik Sermersuup inissiaatillit namminersortut kommunip karsianut akisungaatsiartut kommunip isumaqatigiissuteqarfigisalermagit, Asii Chemnitz Narup kommunimi borgmesteriuvoq. Suliaq taanna taassuma naalakkersuisoqarfiata isornartorsiungaatsiarpaa.

- Akisussaaffiga qimarratiginianngilara, erseqqissarusuinnarparali, sulineq taamani ingerlanneqartoq ataasiinnavimmik siunertaqarsimammat: inissaaleqeruttulernerpaaffiata nalaani, innuttaasullu amerliartuinnarnerisa nalaanni, innuttaasut amerlanerpaat atorsinnaasaminnik inissaqartinneqarnissaminnut periarfissaqartinneqarnissaat.

Asii Chemnitz Narup (IA) Namminersorlutik Oqartussat Kommuneqarfik Sermersuumi ineqarnermut tunngasumut isornartorsiuinerat pillugu tusagassiuutinut nalunaarummi allappoq.

Kommuneqarfik Sermersuup Nuummi inissianik nutaanik pissarsinermini malittarisassat malissimanngilai.

Namminersorlutik Oqartussat Nakkutilliisuisa suliamik misissuisut tamanna inerniliissutigaat.

AAMMA ATUARUK Nakkutilliisoqarfiup aalajangernera borgmesterip tupaallaatigaa

Kommunip nammineq inissiaatileqatigiiffini, Iserit A/S aqqutigalugu inissiaatillit namminersortut isumaqatigiissuteqarfigalugit inissianik 2015-imili pissarsisalernerani Asii Chemnitz Narup borgmesteriuvoq.

Kommunilli aningaasat millionilippassuit isumaqatigiissutit pillugit annaavai. Kommunip iinissiaatilinnut namminersortunut aningaasartuutai ineqartut inimut akiliutaannit annertunerupput. Taamaammat, init taakkua attartorneranni kommuni matussutissiisarluni.

Assersuutigalugu kommunip tassunga 2020-mi aningaasartuutai 11 millionit koruuniupput, ukioq manna 17 millionit koruunit, aappaagulu 27 millionit koruuniunissaat naatsorsuutigineqarluni.

Tamanna pissutigalugu Namminersorlutik Oqartussat nunami imminermut immikkoortortaqarfia Nakkutilliisullu kommunimut isornartorsiuingaatsiarput.

Asii Chemnitz Narupip naalakkersuisoqarfiata taassuma borgmesteriunera isornartorsioraa

Nakkutilliisut kommunip suliaqarsimaneranik maanna aamma isornartorsiuipput. Suliaqarneq taanna unitsinneqarpoq, kommunilu assingusumik isumaqatigiissusioqqusaanani.

Namminersorlutik Oqartussat allaffiani Kommuneqarfik Sermersuup borgmestererisimasaa, Asii Chemnitz Narup maanna nunamut imminermut aningaasaqarnermullu naalakkersuisutut issiavoq.

Taanna kommunip suliamik taassuminnga aallartitsinerani borgmesteriunini pissutigalugu Nakkutilliisut suliamik misissuineranni akuliussinnaatitaanngilaq. Tassunga taarsiullugu Namminersorlutik Oqartussat nakkutilliisinermik suliaq Asii Chemnitz Narupip naalakkersuisoqarfianit peqqinnissamut naalakkersuisup, Kirsten Fenckerip naalakkersuisoqarfianut nuuppaat.

Asii Chemnitz Narup suliamut tunngatillugu nammineq nassuiaateqarluni maanna tusagassiuutinut nalunaaruteqarpoq.

- Uanga borgmesteriunerma nalaani kommunimi, pingaartumik Nuummi, inissiat annertoqisumik amigaataapput. Ilisimaneqareersutut  inissianik amingaateqarneq annertoorujussuuvoq, inissiallu pioreersut amerlaqisut aserfallalluinnarsimasuullutik.

AAMMA ATUARUK Kommuneqarfik Sermersooq nakkutilliisoqarfimmit isornartorsiungaatsiarneqarpoq

Piffissami tamatumanissaaq, uanga borgmesteriunerma nalaani, kommuni, pingaartumik Nuuk, annertuumik nutserfiuvoq, inissiat amerlassutsimikkut killeqareeqisut, ilarpassuilu aserfallassimaqisut, piumaneqarnerisa suli annertunerulernerannik malitseqartunik, Nakkutilliisoqarfiup isornartorsiutaanut sakkortuumut isummersorluni Asii Chemnitz Narup oqaaseqarpoq.

Taassuma kommunip suleriaaseqarnera inatsisinik unioqqutitsinngissorisimavaa. Suliarli inatsisinik unioqqutitsivoq, taassumalu Nakkutilliisunit nammineq naalakkersuisoqarfimminneersunit isornartorsiuineq tusaatissatut tiguaa.

- Taamaattumik Nakkutilliisoqarfiup isornartorsiuinera uanga assut ilungersunartutut tiguara, soqutaarpianngitsutut isigissallugu kissaatiginngilluinnarlugu. Ilisimalikkakka taakku ilanngullugit siunissami suleqqinnissanni eqqaamajumaarpakka.

Isumaqatigiissutillu kommunimi inissianik amerlanerpaanik pissarsinissaq siunertarisimagaat aamma allappaa.

Asii Chemnitz Narup Kommuneqarfik Sermersuumi 2009-mit 2019-imut borgmesteriuvoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl