Kommuneqarfik Sermersumut nuuttut pitsaasumik tikilluaqqusariaqarpagut
Kommunimi innuttaasut ilarpassui danskisuinnaq oqaaseqartuupput, aamma kommunimi eqimattakkuutaat ikitsut oqaatsinik arlalinnik oqaaseqartuupput tuluillu oqaasii atorlugit attaveqaqatigiittarnertik assigiissutigivaat. Innuttaasut imminnut attaveqaqatigiissinnaanerat ineriartornermut pingaaruteqarpoq, oqaatsitsigullu piginnaasaqarluarnissaq ilarpassuinut sulinermi pisariaqarluinnartuulluni.
-Maanga nuuttut ammasuullutik inuiaqatigiinnullu akulerunnissaminnut piumassuseqarlutik tikipparput. Oqaatsitsinnik, kulturitsinnik, oqaluttuarisaanitsinnik 'ulluinnarnilu qanoq immitsinnut pissuseqartarnitsinnik' ilinniarnissaannut periarfissittariaqarpagut. Kommunalbestyrelsimut qinigaassaguma maanga nuuttut inuiaqatigiinnut akuulernissaannut sakkussaannik tunineqarnissaat sulissutigerusuppara. Sunngiffimmi ilinniartitsinerput ullumikkornit eqaannerusumik ingerlattariaqarparput, unnukkut atuartitsineq sapaatip akunneranut aalajangersimasumik pisartussanngorlugu - oktobarimiit poorskip tungaanut, Bodil Karlshøj Poulsen, Demokraatit sinnerlugit Kommuneqarfik Sermersuumi kommunimut qinigassanngortittoq oqarpoq.
Inuiaqatigiit ukiup ingerlanerani ingerlaavartumik ilisarititsinermik ingerlatsisariaqarput, soorlu assersuutigalugu qaammatini pingasuni. Taamatut ilisarititsinermik ingerlatsineq ullukkut pisassaaq. Sulisitsisorpassuit tamatuma iluaqutissartaqarneranik takusaqarsinnaanissaat ilimanartupilussuuvoq taamaattumillu atorfinerlaat sapaatit akunneranut akunnialunni peqataanissaannut periarfississinnaassallugit.
-Ilisaritsitsilluni ingerlatsisarnissaq kommunip sunngiffimmi ilinniartitsinerata illoqarfimmilu suliffeqarfiit suleqatigiissutigineqarnissaa aamma periarfissaavoq. Danskisut-kalaallilsut ileqquusumik eqqarsarneq kisiat sammissanngilarput. Amerlasoorpassuimmi, aamma ilinniagartuujusut, Danmarkimeersuinnaananik aamma nunani allaneersuusarput. Taamaammat aamma tuluttut-kalaallisut ilinniartitsisoqarnissaanik neqerooruteqartoqartariaqarpoq, Bodil Karlshøj Poulsen oqarpoq.
