Kommuneqarfik Sermersooq: Tûgdlik suleqatigilluarparput

Umiarsuaaqqap Tûgdliup Kommuneqarfik Sermersuullu suleqatigiinnerat ajunngitsumik ingerlasimavoq, Meeqqat Ilaqutariillu pillugit Kommuneqarfik Sermersuumi immikkoortortaqarfimmi pisortaq, Mette Sonniks ilisimatitsivoq:

- Tûgdlik 2009-mili suleqataaffigilerpara - suleqateqarnerput ajunngitsupilussuuvoq aammalu allakkatigut isumaqatigiissusiornikkut suleqatigiinnerput ajorani.

Tûgdliup ingerlanneqarnera Namminersorlutik Oqartussat nakkutigisarigaat, Kommuneqarfik Sermersuup inuusuttuaqqat qanoq inneri nakkutigisarivaat. Inuusuttuaqallu Tûgdlimmiitinneqarneri Kommuneqarfik Sermersuumit ernumanartoqartinneqanngilaq.

- Meeqqat paaqqutarineqartut pillugit qaammatit pingasukkaarlugit ataatsimiittarpugut, aammalu akuttunngitsumik isumaqatigiissusioreerata Tûgdlik takusartarlutigu, taamaattumillu Tûgdlimmik suleqateqarnerput ernumanartoqartissimanagu. Meeqqat ilaasa Tûgdlimmi paaqqutarineqarnissaat tulluussorinngikkutsigu, taava meeqqap allami inissinneqarnissa uagut isumagisarparput.

Namminersorlutik Oqartussat Tûgdlik atorunnaarniarlugu aalajangernerat Kommuneqarfik Sermersuumut nalunaarutigineqarsimanngilaq, naak Kommuneqarfiup meeqqanut akisussaanera annertunerugaluartoq.

- Tûgdliup inuusuttuttuaqqanik paaqqutaqartarnissaanik akuersissummik taamaatitsinnissaq akuersissummillu tunisinissaq Namminersorlutik Oqartussat kisimik aalajangertarpaat, akuersissummillu atorunnaarsitsiniarnermi kommune paasiniaaffigineqarsimanngilaq, taamaattumik Oqartussat taama aalajangersimanerat qanorlu tunngaveqarnerat uanga ilisimanngilara, Meeqqat Ilaqutariillu pillugit Kommuneqarfik Sermersuumi immikkoortortaqarfimmi pisortaq, Mette Sonniks oqarpoq.